Kryeministri Rama i cilësoi si “kujdestarë” të zgjedhjeve, por ministrat teknikë të propozuar nga PD-ja ia kanë nisur punës me vrull sapo bënë betimin tek presidenti.
Zv/kryeministrja Ledina Mandia ka bërë mbledhjen e saj të parë duke thirrur veçmas në kryeministri tre ministra të LSI-së, raporton politiko.al.
Mësohet se takimi është zhvilluar në Kryeministri dhe në takim kanë marrë pjesë ministrja Klajda Gjosha, Lefter Koka dhe Sokol Dervishaj. mes tyre është diskutuar për zgjedhjet e 25 qershorit, ndërkohë zëvendëskryeministrja teknike gjatë këtij takimi ka kërkuar që administrata të mos përdoret në zgjedhje.
Ndërkohë, ministrja e re e Mirëqenies Sociale, Xhuljeta Kërtusha, ditën e parë të punës ka anuluar urdhrin e paraardhëses së saj Olta Xhaçka.
Me këtë veprim ajo ka marrë kompetenca për prokurime të cilat Xhaçka ja kishte kaluar dy muaj më parë Sekretarit të Përgjithshëm të Ministrisë.
Nga ana tjetër, ministri “i fortë” në krye të Rendit ka bërë mbledhje me drejtorët e Rendit duke iu kërkuar që policia të mos përfshihet në fushatën zgjedhore.
Dritan Demiraj ka zhvilluar një takim me drejtuesit kryesorë të Policisë në Drejtorinë e Përgjithshme, ku u shpreh se “cilido person me uniformë dhe pa uniformë pjesë e strukturave të Ministrisë së Punëve të Brendshme, që përshihet në fushata duke shkelur parimet kushtetuese dhe ligjet që garantojnë procesin zgjedhor, do të mbajë përgjegjësi administrative dhe penale me largim nga detyra dhe ndjekje penale”.
Ai i ka paralajmëruar policët me burgim nëse veprojnë ndryshe.
“Shpërdorimi i autoritetit policor për të influencuar në mbështetjen e një partie politike është vepër penale dhe dënohet me burgim”, u shpreh Demiraj./tesheshi.com/
