Nga Bashkim Kastrati
Arrestimi i të ashtuquajturit ministër për Kosovën Marko Gjuriç ka nxitur reagime të shumta tek lista serbe, e cila është pjesë e koalicionit qeveritar. Krerët e kësaj liste kanë shkuar të nesërmen në zyrën kryeministrit serb Aleksandër Vuçiç nga ku kanë deklaruar se largohen nga Qeveria e Kosovës.
Ata kanë deklaruar se do të mbesin opozitë në Kuvendin e Kosovës, dhe siç kanë deklaruar do të mbrojnë serbët e Kosovës.
Në Qeveri nuk kanë qartësi për situatën. Vetë kryeministri Ramush Haradinaj beson se Lista edhe më tej i mban në ekzekutiv ministrat, ndërsa zëvendëskryeministri Dalibor Jevtiç, që i përket kësaj partie, të enjten ka qenë në mbledhjen e Qeverisë sa për të shprehur pikëpamjen e tij për aksionin policor të së hënës që çoi në arrestimin e Marko Gjuriçit, shkaku që kishte hyrë në Kosovë pa pasur lejen e Qeverisë. Ai la mbledhjen pasi përfundoi pika e rendit të ditës që kishte të bënte me fjalën e tij, ndërkaq nuk bëri të ditur aty nëse po e braktiste përfundimisht Qeverinë.
“Vendimi për tërheqje nga Qeveria e Kosovës është sjell unanimisht, në mënyrë të përbashkët. Këtë vendim ia kemi thënë sot presidentit Vuçiç dhe ai e ka mbështetur”, ka thënë zëvendëskryeministri i Kosovës, Dalibor Jevtiç.
Zëvendëskryeministri Jevtiç ka thënë se lista serbe më nuk do të ofrojë mbështetje as në Kuvendin e Kosovës, për iniciativat e Qeverisë.
“Pra, ne në Kuvendin e Kosovës më nuk do t’i mbështesim më vendimet, të cilat janë iniciativa të Qeverisë. Se çfarë do të ndodhë tutje apo nëse kjo do të nxisë ndonjë iniciativë për ndonjë Qeveri të unitetit kombëtar, atëherë le të unifikohen. Por, dëshiroj që në mënyrë demokratike të luftojmë për atë që na takon, e kjo është liria”, ka thënë Jevtiç.
Në këtë situatë Lidhja Demokratike e Kosovës ka deklaruar se nuk do të lejojë që lista serbe të përcaktojë fatin e proceseve të rëndësishme në Kosovë dhe kanë lënë të kuptohet se nuk do të lejojnë që Qeveria Haradinaj të bie për shkak të situatës së krijuar ditëve të fundit pas arrestimit të Gjuriqit në veri të vendit.
Duke marrë parasysh se votat e listës serbe ishin vendimtare për krijimin e qeverisë aktuale, u tha se mund të bie qeveria pas daljes së deputetëve serb, pasi që koalicioni qeverisës pa serbët mbetet me 53 deputetë.
Pavarësisht që ministrat serb kanë hequr dorë nga përgjegjësitë për të qenë ministra, pra nuk dalin fare në punë. Ata vazhdojnë t’i marrin pagat e tyre të majme, vazhdojnë t’i mbajnë veturat luksoze të taksapaguesve kosovarë dhe i shfrytëzojnë edhe derivatet e shtetit të Kosovës.
Ministrat dhe zv.ministrat serb nuk kanë dorëzuar as telefonat dhe numrat zyrtarë, kredit-kartelat dhe asetet dhe tjera shtetërore.
Pra ata shfrytëzojnë veturat, karburantin dhe asetet tjera për të shkuar në serbi tek presidenti Vuçiç dhe për t’u dakorduar për hapat e mëtutjeshme. Këta ministra po shfrytëzojnë asetet që janë blerë me taksa të qytetarëve për të punuar kundër shtetit të Kosovës, pasi që të njëjtit nuk e njohin Kosovën si shtet të pavarur.
Ndryshe, ardhja e listës serbe në skenën politike të Kosovës ka ndikuar negativisht në integrimin e serbeve të Kosovës në institucione. Pas krijimit të kësaj liste ka pasur një dezintegrim të serbëve, ndërsa partitë serbe që e kanë njohur pavarësinë e Kosovës, pas krijimit të listës serbe nuk kanë mundur të marrin më shumë se një post të deputetit. /tesheshi.com/
