Dy ministra të qeverisë Kurti, ku veçon Xhelal Sveçla i Rendit, njeriu që është përballur më së shumti me bandat serbe në veri, kanë bujtur në një familje serbe, aty ku ekziston njëfarë bashkëjetese paqësore shqiptaro-serbe, në Shtërpcë, mes Prizrenit e Ferizaj. Kjo, me rastin e Krishtlindjes ortodokse.
Këtë e ka bërë të ditur vetë Sveçla përmes një postimi në Facebook, ku ka treguar se është mirëpritur në familjet Illiç dhe Filipoviç, së bashku dhe me një tjetër ministër.
“Bashkë me ministrin Elbert Krasniqi vizituam familjet Illic dhe Filipovic në Shtërpcë të cilët hapën dyert për uruar e festuar së bashku me ta Krishtlindjen orthodokse.
Nga këto familje mikpritëse e punëtore ua përcjellim urimet e përzemërta të gjithë besimtarëve bashkëqytetarë tanë që festojnë sot Krishtlindjet ortodokse sipas kalendarit julian. Gëzime paçi në familjet tuaja”, ka shkruar Sveçla.
Sakaq, komunitetin serb me rastin e Krishtlindjes ortodokse e ka uruar edhe kryeministri Albin Kurti.
Përmes një postimi në rrjetet sociale, Kurti uron në gjuhën shqipe dhe atë serbe.
“Krishtlindja është kohë e shpresës, mirënjohjes dhe mirësisë. Në këtë ditë të veçantë i dërgoj urimet më të mira për të gjithë bashkëqytetarët tanë nga komuniteti serb të besimit ortodoks që festojnë sot. Gëzuar Krishtlindjen! Ju dëshiroj paqe dhe gëzim”, shprehet Kurti. /tesheshi.com/
