Frank-Walter Steinmeier dhe Jean-Marc Ayrault janë për herë të parë në një vizitë në lindje të Ukrainës, aty ku luftohet prej dy vitesh mes forcave qeveritare dhe separatistëve prorusë.
Agjencia e lajmeve AFP njofton për vizitën e tyre në Kramatorsk, një qytet i kontrolluar nga ushtria ukrainase.
Vizita po kryhet vetëm pas një prej ditëve më të përgjakshme të konfliktit gjatë shumë javëve, ndërsa të dy palët kanë humbur nga tre luftëtarë.
Gjermania dhe Franca kanë ndihmuar në negociimin e marrëveshjes së vitit të shkuar për ndërprerjen e luftimeve, por Marrëveshja e Minskut, ashtu si disa armëpushime të mëpastajme, nuk kanë dhënë rezultat si duhet.
Kryediplomatët e dy vendeve perëndimore i kanë nxitur autoritetet e Kievit të angazhohen më shumë për zbatimin e planit me 13 pika të shkurtit të 2015-tës, që parashikon dhënien e një autonomie të pjesshme rebelëve brenda një Ukraine të bashkuar.
Steinmeier dhe Ayrault janë përballur me demonstrues para zyrës së Misionit Special Monitorues të OSBE-së, që nëpërmjet thirrjeve të tyre, “Ne jemi Ukrainë” dhe “Jo status special për Donbasin” u bënë të ditur shtetarëve perëndimorë kundërshtinë për dhënien e një autonomie të pjesshme seperatistëve prorusë. /tesheshi.com/
