Ministri i Jashtëm gjerman, Frank-Walter Steinmeier, pret sot në Berlin homologët e pesë vendeve, të Francës, Holandës, Italisë, Belgjikës dhe Luksemburgut, në një takim të ngutshëm, ku do të bisedohet për çështjet politike aktuale në Europë, me fokusin kryesor në referendumin britanik.
Udhëheqësit europianë janë në kërkim të një tranzicioni sa më pak të dhimbshëm, ndërsa kryediplomatët e gjashtë vendeve themeluese mblidhen në Berlin në nisje të një serie takimesh krize në javët e ardhshme.
Shefi i politikës së jashtme gjermane u shpreh se BE-ja nuk duhet të bjerë në depresion dhe në paralizë pasi referendumi britanik vendosi për daljen e Mbretërisë së Bashkuar nga unioni europian.
Në takimin e sotëm do të diskutohet për procesin dhe shpejtësinë e daljes së Britanisë. Ndërkohë, takimi i parë i udhëheqësve të BE-së pa përfaqësimin britanik ka për t’u mbajtur të mërkurën.
Pjesëmarrësit në takimin e sotëm u përkasin gjashtë vendeve që në vitet 1950 bashkuan forcat dhe ende përbëjnë bërthamën e BE-së, Gjermanisë, Francës, Italisë, Belgjikës, Luksemburgut dhe Holandës. /tesheshi.com/
