Në pamundësi për të gjetur konsensus për shpërndarjen e refugjatëve në vendet anëtare të bllokut, BE po mendon edhe për masa drastike. Kuotat e detyrueshme nuk janë pranuar nga të paktën katër vende të Europës qendrore dhe lindore e shumë të tjera kanë shprehur ngurrim për të pranuar refugjatë më shumë sesa konsiderojnë se mund të përballojnë.
Ministrat e Brendshëm të vendeve të BE-së që mblidhen në një samti ditën e martë mund të marrin në konsideratë edhe vendosjen e gjobave të majme për vendet që nuk pranojnë të strehojnë refugjatët.
Mendohet për gjoba që mund të shkojnë deri në 6500 euro për secilin refugjat të refuzuar nga shtetet ku ata kërkojnë azil, por shuma nuk mund të tejkalojë 30 për qind të totalit të kuotës së detyrueshme që duhej të pranonte shteti në fjalë.
Mundësia tjetër mbi të cilën mund të ngrihet kompromis është ajo e “vonesës” gjashtëmujore për azilantët, që edhe pse nuk do të pranohen nga vendi përkatës, do të strehohen aty për gjashtë muaj deri në një vendim të ri.
Ndërkaq, në samitin e sotëm, kryeministri hungarez, Viktor Orban bëri thirrje për unitet në BE në lidhje me krizën e refugjatëve, ndërsa së bashku me Slloveninë, Poloninë e Kroacinë diskutuan masat për të frenuar fluksin e refugjatëve.
Samiti i nesërm, pritet të jetë më i rëndësishmi i kohëve të fundit, pasi ministrat e Jashtëm do të vendosin për zhvendosjen e 120 mijë refugjatëve në shtetet e BE-së. /tesheshi.com/
