Në mbledhjen e tij të martën në Bruksel, Këshilli i Ministrave i Bashkimit Evropian përshëndeti metodologjinë e ndryshuar të procesit të pranimit në BE, dhe Këshilli tha që pret që vendimet pozitive në mars me hapjen e negociatave me Tiranën dhe Shkupin, që të vazhdojë procesi i zgjerimit në Ballkanin Perëndimor.
“Ekziston një mbështetje e madhe për angazhimin në tre pista në vitin 2020, domethënë për një metodologji të rishikuar, për fillimin e negociatave të pranimit për Maqedoninë Veriore dhe Shqipërinë, dhe për përqendrimin në zhvillimin ekonomik dhe sundimin e ligjit në rajon”, tha nënkryetari i Komisionit Evropian Maroš Sefcovich.
Takimi i Këshillit të Ministrave të Përgjithshëm dhe Çështjeve Evropiane u zhvillua në përgatitje të samitit të BE-së, i cili në muajin mars duhet, përveç të tjerave, të kthehehet në çështjen e politikës së zgjerimit, në mënyrë që të arrihet një konsensus për fillimin e negociatave të pranimit me Maqedoninë Veriore dhe Shqipërinë.
Komisioneri i Zgjerimit të BE, Oliver Varhelyi informoi ministrat evropianë për propozimin e Komisionit për një metodologji të rishikuar të negociatave të pranimit.
Sekretari i Shtetit gjerman për Evropën Michael Roth, i cili mori pjesë në takim, thotë se Berlini zyrtar mbështet propozimin.
“Propozimi, nga njëra anë, jep një angazhim të qartë për perspektivën evropiane të Ballkanit Perëndimor; nga ana tjetër, ai përqendrohet qartë në vlerat thelbësore të Unionit, siç janë demokracia, sundimi i ligjit, pajtimi në rajon dhe respektimi i pakicave etnike e fetare”, thotë Roth. /tesheshi.com/
