“Minatori” i Mitrovicës: punë shqiptarësh apo europianësh?!

E shtuna e pritshme do jetë për Mitrovicën jo një ditë e zakonshme, pasi pritet të inaguruhet palestra e sporteve “Minatori”, një investim 2.6 milion euro i Komisionit Evropian, që në fakt ka marrë trajtat e një legjende për shkak të vonesës të pazakontë në mbyllje të punimeve dhe vënien në funksion. Sipas planit, ajo duhet të dorëzohej para dy viteve.

Por a është vërtet gati kjo palestër ashtu siç duhet të jetë?!

A ka justifikuar ajo 2.6 milion euro investim?!

Një burim kofidencial i tha tesheshi.com se palestra është në gjendje katastrofale, madje edhe më keq se që ka qenë pa filluar renovimi i saj me financim të KE-së.

Sipas tij, para 4 vite e më shumë kur kanë filluar punimet në renovimin e palestrës sportive “Minatori”, kjo salla ka pikuar vetëm në një vend, por tani fakt të keq palestra pikon në të gjitha anët edhe pas renovimit të tërësishëm të kulmit.

“Se për çfarë renovimi bëhet fjalë ju lutem shikoni fotot që janë bërë të hënën kur në Mitrovicë ka rënë shi gjatë gjithë ditës e uji ka depërtuar në të gjitha anët”, ka thënë burimi duke kërkua që të mbetet anonim.

Burimi ka shtuar se me 2.6 milion euro, jo që është dashur kjo palestër të jetë simbol i bukurisë dhe funksionalitetit, por me këtë para ka pauar mundësi që të ndërtohet një arenë sportive me mbi 4000 shikues.

“Komuna e Mitrovicës, ka formuar një komision i cili  pritet të bëjë pranimin teknik të punëve që janë kryer në palestër nga ana e Komisionit Evropian”, ka thënë për portalin tesheshi.com, një nga anëtarët e komisionit por që ka dashur të mbetet anonim.

Sipas tij, palestra “Minatori” është rinovuar nga ana e Komisionit Evropian; dhe ata kanë dhënë paratë, ata kanë shpallë tenderin, ata kanë përzgjedhur kompaninë ndërkombëtare (nga Portugalia), për kryerjen e punëve; pra Komuna e Mitrovicës nuk ka asnjë përgjegjësi për këtë masakër që është bërë në këtë sallë të sporteve.

Biseduesi ka pranuar se janë në dijeni që salla pikon dhe për shumë defekte të tjera që tani janë duke e shoqëruar këtë renovim.

“Po jemi në dijeni, na kanë njoftuar përgjegjësit e sallës “Minatori” se të hënën gjatë kohës sa ka rënë shi salla ka pikuar në të gjitha anët, por nuk është vetëm ky problemi. Aty ka edhe shumë gjëra të tjera që nuk janë bërë në bazë të projektit që ka qenë në fillim”, ka thënë anëtari i komisionit për pranimin teknik të sallës “Minatori”.

“Si do të shkojë puna rreth kësaj nuk e di, pasi që zyra e BE-se dhe Komisionit Evropian në Prishtinë janë duke bërë presion mbi komunën e Mitrovicës që kjo sallë të pranohet edhe teknikisht”, ka thënë burimi i portalit tesheshi.com.

Zyrtarëë komunal në Mitrovicë nuk kanë dashur që të flasin rreth këtij problemi, por gjatë ditës kanë lëshuar një komunikatë për medie të cilën portali do ta sjell në terësi.

Komunikata e lëshuar nga Komuna e Mitrovicës:

Pas shumë prolongimeve, për shkak të vonesës së punimeve për renovimin e saj, salla e sporteve “Minatori”, buzë Ibrit, do të inaugurohet solemnisht të shtunën, më 13.03.2016, në ora 18:00. Kështu është vendosur në një takim që Kryetari i komunës, Agim Bahtiri, nënkryetari Safet Kamberi dhe drejtori i Drejtorisë për Kulturë, Rini dhe Sport, Tafil Peci, kanë mbajtur me drejtuesit e KB “Trepça”, udhëhequr nga drejtori sportiv Besim Braha.

 Inaugurimi solemn do të bëhet para se në orën 19:00 të fillojë ndeshja derbi në basketboll ndërmjet Trepçës dhe Sigal Prishtinës.

Në takim është biseduar për përgatitjet e nevojshme për hapjen solemne të sallës, me ç’rast janë ndarë detyrat dhe përgjegjësit e komunës dhe të KB “Trepça”.

 U tha se në inaugurimin solemn të sallës së rinovuar do të marrin pjesë mysafirë të shumtë nga institucionet më të larta të vendit, përfaqësues të lartë të BE, përfaqësues të institucioneve e asociacioneve të ndryshme sportive etj.

Kryetari Bahtiri kërkoi nga të pranishmit që të përkujdesen maksimalisht edhe për çështjet e sigurisë me qëllim që të ndërmerren të gjitha masat e duhura për të parandaluar ekseset eventuale.

 Ai tha se duhet të bisedohet edhe me tifozët e Trepçës, në mënyrë që mysafirët dhe basketbollistët e Sigal Prishtinës të mirëpriten vëllazërisht, ndërsa që në terren të zhvillohet lojë korrekte dhe të fitoj më i miri, pra që gjithçka të kaloj në frymë sportive e miqësore.

 /tesheshi.com/