Tri mina me celular që do të shiteshin në Tiranë janë zbuluar mbrëmjen e së martës në zonën e Yzberishtit gjatë një operacioni të Komisariatit nr.6.
Dy personat e kapur në flagrancë, Jurgen Muho dhe Eraldo Kataroshi, janë arrestuar me akuzën “mbajtje pa leje e armëve, bombave apo minave ose lëndëve plasëse”, e kryer në bashkëpunim.
Burime nga policia thanë se hetimet janë përqendruar në identifikimin e personave të tjerë të përfshirë në këtë aktivitet. Nga pyetja e Jurgen Muhos, si dhe Eraldo Kataroshit, policia ka zbuluar se bombat ishin marrë në Elbasan nga Jurgon Muho, me porosi të Kataroshit, raporton tv Klan.
Muho u ka pohuar hetuesve se kishte pranuar të bënte transportin e një pakoje që nuk e dinte ç’kishte në të. Pak momente pasi mbërriti në “Unazën e Re”, policia ndaloi Muhon, bashkë me tri bombat.
Ndërkohë, të njëjtat burime shprehen se Eraldo Kataroshi nuk ka pranuar të tregojë për policinë lidhjet, kush i ka prodhuar apo kush do t’i blinte. /tesheshi.com/
