Dje, në orët e pasdites, banorët e “Bajram Curri”, pritën kryetaren e komunës së Gjakovës, znj. Mimoza Kusari- Lila dhe grupin e vrapimit “Germia 555”, të cilët në një vrapim të gjatë shënuan “Maratonën Kombëtare të Malësisë së Gjakovës”. Nën shiun e rrëmbyeshëm ata u pritën edhe nga kryetari i bashkisë së Tropojës, Besnik Dushaj, i cili tha se grupi i vrapimit meriton një falënderim të veçantë, së bashku me kryetaren Kusari-Lila, si pjesë e grupit që ishte edhe ajo, duke treguar një pasion të veçantë, ndonëse në kushte atmosferike jo të përshtatshme.
“Shënimi i këtij shtegu mjaft sfidues dhe atraktiv sot, tha kryetari Dushaj, është nisja e një serie maratonash me vrapues me famë botërore, dhe ka si synim kryesor promovimin e bukurive të Malësisë së Gjakovës. Kjo maratonë gjithashtu jep kontribut në forcimin e mëtejshëm të marrëdhënieve tona vëllazërore, një maratonë, rruga e të cilës virtualisht bashkon më shumë shqiptarët e Tropojës dhe Gjakovës, dy copëza të një zemre, të ndarë padrejtësisht nga histori.
Vrapuesit në shënimin e këtij shtegu filluan me maratonisten e parë në regjion e njohur si “marathon mayor”, znj. Mimoza Kusari-Lila. Vrapuesit e tjerë, pjesëmarrës në shënimin e garës, ishin vrapues që kanë bërë maratona në vende të ndryshme europiane.
Shtegu i vrapimit filloj nga sheshi “Nëna Terezë” në Gjakovë dhe përfundoi tek monumenti i heroit të malësisë së Gjakovës, Bajram Curri. Pas mbi 5 orë vrapim, ata arritën në “Bajram Curr”, ku u pritën me duartrokitje vëllazërore nga banorët e shumtë.
Pas përfundimit me sukses të shënimit të shtegut të maratonës së Malësisë së Gjakovës, anëtarët e klubit “Gërmia 555”, do të vazhdojnë me përgatitjet për maratonë e Vjenës dhe më pas me organizimin e maratonës së parë në muajin tetor të Malësisë së Gjakovës. Përgatiti: Gjon Neçaj – /tesheshi.com
