Kryetarja e komunës së Gjakovës ka kërkuar që qeveria dhe kryeministri Mustafa të mos bazohen në logot politike kur bëhet fjalë për bashkëpunim me komunat që nuk drejtohen nga LDK. Ajo ka dhënë si shembull të këtij mosbashkëpunimi nga ana e Mustafës rastin që vizitën e kryeministrit në Gjakovë e kishte mësuar përmes radios. Si kryetare e komunës, i takonte asaj ta priste Mustafën në vizitën e tij.
“Ja shembulli, unë duke ardhur në Pejë e dëgjova në radio se Kryeministri sot qëndron në Gjakovë. Kjo nuk na bën mirë. Në të gjitha komunat ku qeveris LDK, Mustafa është shoqëruar nga kryetarët përkatës. Mendoj se duhen ulur logot partiake sepse Gjakova është ajka e një pjese të mirë të Kosovës dhe edhe kryeministri ka nevojë për Gjakovën”, ka thënë Kusari-Lila, e cituar nga KosovaPress.
Kryetarja e komunës së Gjakovës ishte e ftuar për të paraqitur arritjet dhe sfidat në këtë qytet. Gjatë fjalës së saj ajo tha se Qeveria lë shumë për të dëshiruar sa i takon mbështetjes për Gjakovën.
“Janë projekte që në tërësi kapin shifrën mbi 46 milionë euro e që kryesisht vijnë nga BE dhe institucione ndërkombëtare për komunën e Gjakovës, të cilat nuk kanë marrë mbështetjen bazike qeveritare në asnjë rast, tha Kusari Lila. /tesheshi.com/
