Ish-ministri i Jashtëm Paskal Milo u shfaq kritik ndaj gjuhës së kryeministrit Rama pas mbledhjes së dy qeverive në Pejë. Ish-aleat me të në opozitë dhe “i pashpërblyer” më pas në kushte pushteti, Milo bëri dhe ai kujdes që të mos e demonizonte në çdo gjë, duke ia konsideruar si normale disa reagime.
“Nuk është hera e parë që Rama i bën vetes reklamë agresive kur shkon në Kosovë. Rama nuk shquhet për fjalor diplomatik. Është një kryeministër atipik, me karakteristikat e veta, që nuk pyet shumë për rregulla dhe paraqitje protokollare. Këtë gjë bënte edhe si kreu i Bashkisë së Tiranës.
Fjalori i tij në Pejë dhe kritikat ndaj komunitetit ndërkombëtar nuk ishin të parat e as do të jenë të fundit sepse shquhet për karakter të fortë. Ky lloj protagonizmi ka të bëjë dhe me atë që Shqipëria gjithmonë e ka mbështetur Kosovën, por vjen natyrshëm sepse Shqipëria është konsideruar si shteti amë nga kosovarët.
Shqiptarët e Kosovës i kanë drejtuar sytë nga ne dhe i kanë dhënë të drejtën e përkujdesjes. Disa qëndrime të Ramës, si për çështjen e vizave, Kosova i mirëpriti”, deklaroi Milo, i ftuar në Top Talk në TCH.
Megjithatë, Milo nuk është i idesë së deklarimet e shefit të qeverisë do kenë rezultate në zhvillimet e mëtejshme.
“Shfaqjet dhe qëndrimet kritike të tij (Ramës) dhe mënyra se si i artikulon kudo ku është, nuk ndihmojnë, përkundrazi, krijojnë idenë se kryeministri i Shqipërisë është kryeministri i një vendi të vogël që pretendon shumë dhe nuk ndihmojnë për ta parë Shqipërinë në një dritë realiste”, shtoi njeriu që prej vitesh drejton dhe partinë Demokracia Sociale. /tesheshi.com/
