Komisioni Evropian së shpejti do të propozojë që Bashkimi Evropian t’u japë para shtesë vendeve që duan të bëhen anëtare të unionit dhe t’u ofrojë atyre akses në tregun e përbashkët në mënyrë që të përshpejtojnë përgatitjet e tyre për anëtarësim, tha të enjten komisioneri për Zgjerim i BE-së, Oliver Varhelyi, raporton Reuters.
Tetë vende aktualisht kanë statusin zyrtar të kandidatit – Shqipëria, Bosnja, Mali i Zi, Moldavia, Maqedonia e Veriut, Serbia, Turqia dhe Ukraina – ndërsa Gjeorgjia dhe Kosova janë kandidatë të mundshëm, kujton agjencia britanike.
Udhëheqësi i BE-së Charles Michel bëri thirrje që të përgatitet për pranimin e anëtarëve të rinj dhe kandidatët të jenë të gatshëm të përmbushin kriteret për anëtarësim deri në vitin 2030.
“Në javët e ardhshme do të shihni prezantimin e një mënyre të re të të menduarit për zgjerimin dhe një paketë që tani do të përfshijë 10 vende kandidate apo vende me perspektivë evropiane. Në raport, ne nuk duam vetëm përparim, por t’u ofrojmë atyre mjetet për integrim të përshpejtuar“, tha Varhelyi në konferencën për shtyp.
Ai foli pas takimit të ministrave të BE-së në Spanjë, ku u diskutua për mënyrën e përgatitjes së Unionit për pranimin e anëtarëve të rinj.
Varhelyi tha se BE-ja duhet të përpiqet të ndihmojë kandidatët për përgatitje më të shpejta për anëtarësim përmes planit të rritjes për Ballkanin Perëndimor në mënyrë që të zvogëlojë “hendekun ekonomik dhe social” midis këtyre vendeve dhe pjesës tjetër të BE-së përpara se të anëtarësohen.
Treguesi i gatishmërisë për zgjerim
Sipas kësaj skeme, vendet gradualisht do të kenë akses në tregun e vetëm të BE-së prej 450 milionë konsumatorësh, ku mallrat, shërbimet, puna dhe kapitali rrjedhin më lirshëm, madje edhe përpara anëtarësimit të plotë në BE.
“Ne duam të krijojmë një mundësi për përfshirjen graduale të këtyre vendeve në tregun e përbashkët, në katër liritë, edhe para anëtarësimit, sepse kjo do të jetë e dobishme si për Bashkimin Evropian, ashtu edhe për vendet kandidate”, tha Komisioneri Evropian për Zgjerimi.
Ai tha se propozimi i Komisionit do të kërkonte gjithashtu më shumë para të BE për kandidatët për të përshpejtuar reformat e nevojshme për t’u bashkuar me bllokun 27-vendesh. Reuters tha se shumat e mundshme nuk u zbuluan.
Paratë do të jenë si shtesë e fondeve ekzistuese të para-anëtarësimit për vendet kandidate, të cilat në buxhetin e BE-së për periudhën 2021-2027 arrijnë në 14.2 miliardë euro.
Varhelyi përfundoi se këto masa do të tregojnë se BE-ja është e gatshme të pranojë anëtarë të rinj dhe të ftojë vendet kandidate që të përfitojnë plotësisht nga këto mundësi. /tesheshi.com/
