Të paktën 25 persona kanë vdekur në zjarret e Los Anxhelosit që vazhdojnë të shkaktojnë shkatërrime masive në shtetin amerikan të Kalifornisë.
Për ditët në vijim parashikohen erëra më të forta, të cilat mund të shkaktojnë probleme më të mëdha dhe të përhapin zjarrin, thanë zyrtarët të mërkurën. Dy zjarre në zonat Eaton dhe Palisades dogjën më shumë se 40,000 hektarë bimësi, duke shkatërruar më shumë se 12,300 shtëpi, biznese, kisha dhe shkolla.
Zjarrfikësit janë ende duke punuar për të kontrolluar zjarrin, por zyrtarët po paralajmërojnë se kushtet mund të përkeqësohen gjatë javës së ardhshme pasi
priten erëra më të forta.
Shërbimi Kombëtar i Motit në Los Anxhelos njoftoi se lajmi i mirë është se moti do të përmirësohet, por lajmi i keq është se javën e ardhshme priten ende erëra të forta, të cilat mund të përkeqësojnë situatën në disa zona.
Nuk dihen ende shkaqet e zjarrit, por hetuesit nuk e përjashtojnë mundësinë që të jetë zjarrvënie. Departamenti i Pyjeve dhe Mbrojtjes nga Zjarri i Kalifornisë po heton gjithashtu nëse linjat elektrike mund të kenë shkaktuar zjarrin në Eaton, i cili vrau 16
njerëz.
Sipas presidentit Joe Biden, vlerësimet paraprake të dëmeve nga zjarret vlerësohen në dhjetëra miliarda dollarë. “Kjo do të jetë, nëse jo më e shtrenjta, ndër fatkeqësitë më të shtrenjta në historinë e SHBA-së”, tha Biden.
Gjigantët e teknologjisë Google dhe YouTube kanë njoftuar 15 milionë dollarë donacione për përpjekjet e ndihmës dhe rimëkëmbjes pas zjarreve. Disney gjithashtu premtoi 15 milionë dollarë ndihmë, përveç
hapjes së magazinës së garderobës për punonjësit dhe familjet e tyre që humbën shtëpitë e tyre nga zjarret.
Të famshëm të Hollivudit po kontribuojnë gjithashtu në përpjekjet e rimëkëmbjes. Aktorët Leonardo DiCaprio, Eva Longoria dhe Jamie Lee Curtis kanë shpallur donacione prej një milion dollarësh secili. Fondacioni BeyGood i këngëtares Beyonce dhuroi 2.5 milionë dollarë. /tesheshi.com/
