Forcat Demokratike të Sirisë (SDF), të cilët kanë mbështetjen e SHBA-ve, kanë njoftuar se Turqia do të marrë “një përgjigje të duhur ” në qoftë se dëshiron të bëjë realitet një kërcënim për të zgjeruar sulmet ndaj pozicioneve të kësaj milicie kurde në Siri.
Redur Xelil, një zyrtar i lartë i SDF që gëzon mbështetjen e SHBA-së, reagoi ndaj kërcënimeve të bëra nga Presidenti Erdogan.
“Kurdo që ai të përpiqet të zgjerojë betejën e tij, do të marrë një përgjigje të duhur”, tha Xelil për Reuters.
Erdogan më herët tha se Ankaraja mund të zgjeronte operacionet ushtarake në veriperëndim të Sirisë dhe në lindje, deri në kufirin me Irakun.
Duke folur me krerët e provincave të partisë së tij për Drejtësi dhe Zhvillim, Erdogan tha se Turqia do të “vazhdojë në lindje, duke përfshirë edhe qytetin e Manbij”, raportoi Reuters.
“Operacioni ‘Dega e ullirit’ do të zgjasë derisa të arrijë objektivat e tij. Ne do të pastrojmë Manbij-in nga terroristët dhe lufta jonë do të zgjasë për aq kohë sa të ketë terroristë në kufirin tonë me Irakun”, tha Erdogan.
Turqia filloi të shtunën një operacion të quajtur “Dega e ullirit” dhe ndërmori sulme ajrore mbi “Njësinë e Mbrojtjes së Popullit”, YPG-së kurde, të mbështetur nga amerikanët, të cilën Ankara e konsideron të jetë një krah i zgjeruar i Partisë së Punëtorëve të Kurdistanit (PKK). /tesheshi.com/
