Jeta e miliarderit danez Anders Holch Povlsen, 51 vjeç, u shënua nga një tragjedi e tmerrshme në prill 2019.
Tre nga fëmijët e tij u vranë në sulmin terrorist në Sri Lanka, mes qindra viktimave.
Vajzat e tij Alma (15) dhe Agnes (12) dhe djali Alfred (5) vdiqën në një sulm me bombë në tre kisha dhe një hotel në të njëjtën kohë, ndërsa vajza e tij Astrid mbijetoi.
Fëmijët dhe nëna e tyre ishin në Sri Lanka për festat e Pashkëve.
Kush është Anders Holch Povlsen?
Ai ka lindur më 4 nëntor 1972. Ai është pronar i Bestseller, një zinxhir veshjesh i themeluar nga prindërit e tij. Ata hapën dyqanin e parë familjar në vitin 1975 në qytetin e vogël danez të Ringkøbing. Povlsen mori përsipër biznesin në moshën 28-vjeçare dhe sot është pronari i vetëm i tij. Bestselleri ka nën emrin e tij marka të famshme si Jack&Jones, Only dhe Vero Moda.
Ai zotëron pothuajse 900 kilometra katrorë tokë në Skoci. Kjo do të thotë gjithashtu se miliarderi danez është pronari më i madh i tokës në atë pjesë të Mbretërisë së Bashkuar, ndërsa ai është personi i dytë më i pasur në të gjithë Mbretërinë e Bashkuar. Sipas Daily Mail, Povlsen ka një kështjellë në portofolin e tij prej 11 pronash skoceze, ku shpenzoi rreth 100 milionë paund për të gjitha.
Ai u takua me gruan e tij Anne kur ajo filloi të punonte në shitje në Besteller. Bashkëshortët janë pronarë të pronës Wildland nën kujdesin e së cilës ndodhen pronat e tyre dhe të dy janë të interesuar të ruajnë, përveç trashëgimisë natyrore, edhe trashëgiminë kulturore dhe arkeologjike.
“Ne duam të rivendosim pjesë të malësive skoceze, t’i kthejmë ato në gjendjen e tyre të dikurshme të lavdishme dhe të riparojmë dëmet e shkaktuara nga veprimet e njerëzve. Nuk ka të bëjë vetëm me tokën si e tillë, por edhe me elementë të tjerë të trashëgimisë së pasur të Skocisë“, thuhet në përshkrimin e misionit të Wildland i nënshkruar nga Anne dhe Anders Povlsen.
Të dy u përfshinë intensivisht në programin kombëtar britanik të pyllëzimit, duke mbjellë miliona pemë dhe duke u kujdesur për gjuetinë e drerëve, të cilët nuk kanë armiq natyrorë në Glenfeshie dhe kanë qenë të shumtë. Përveç kujdesit për hapësirat natyrore, çifti ka investuar miliona paund në rinovimin e shtëpive të fermave dhe kabinave pyjore në prona me qira luksoze por të izoluara. Çifti kishte katër fëmijë, tre prej të cilëve u vranë në të njëjtën ditë.
Një vit pas tragjedisë, familja Povlsen mori një lajm të mirë. Miliarderi danez dhe gruaja e tij patën binjakë në fillim të vitit 2020.
“Dy mrekulli të vogla”, janë fjalët që përdorën Anders dhe Anne për të përshkruar vajzat e lindura më 12 mars 2020 në Danimarkë.
Sot, familja jeton një jetë të qetë dhe të izoluar në Constantinsborg, Danimarkë dhe Povlsen pothuajse nuk jep intervista. Megjithatë, në një intervistë të rrallë me Strathspey & Badenoch Herald, ai tha se “paratë nuk janë gjithçka” dhe shtoi se nuk e di pse mediat, veçanërisht ato daneze, janë kaq të magjepsura nga jeta dhe suksesi i tij. /tesheshi.com/
