Miliarderi emirati Khalaf al-Habtoor tha se miliona refugjatë palestinezë nuk do të kthehen më në shtëpitë që lanë pas në Nakba në 1948 dhe e përshkroi këmbënguljen e Palestinës për të drejtën e kthimit si kokëfortësi. Deklarata të tilla nga biznesmeni emiratas u kritikuan ashpër dhe provokuan zemërim në rrjetet sociale.
Al-Habtoor shtoi, në një artikull në gjuhën angleze botuar në gazetën izraelite Haaretz, se “në vend që të kërkonte kthimin e refugjatëve palestinezë nga Siria, Jordania, Libani dhe vendet e tjera, do të ishte më mirë t’u kërkohej vendeve pritëse të prishnin kampe dhe t’u jepnin refugjatëve të drejtën të punojnë dhe të kenë shtëpinë e tyre”.
Miliarderi emiratas, i njohur për mbështetjen e tij për normalizimin e marrëdhënieve me Izraelin për vite me radhë, pohoi se refugjatët palestinezë “u përcjellin fëmijëve të tyre shpresë të rreme dhe u dorëzojnë çelësat ish-shtëpive të baballarëve ose gjyshërve të tyre, duke nxitur urrejtjen e thellë të izraelitëve nga brezi në brez”.
Artikulli i Al-Habtoor u prit mirë në qarqet izraelite. “Një njeri paqësor, Z. Khalaf al-Habtoor shkroi të vërtetën,” tha gazetari dhe akademiku izraelit Edy Cohen duke komentuar artikullin e Al-Habtoor.
Nga ana tjetër, në mediat sociale, shumë aktivistë në mediat sociale kritikuan ashpër deklaratat e Al-Habtoor në lidhje me të drejtën e kthimit të refugjatëve dhe shumë njerëz me zemërim pyesnin se kush i dha të drejtën biznesmenit emiratas për të folur në emër të miliona palestinezëve në diasporë.
Disa aktivistë besojnë se deklarata të tilla nga Al-Habtoor i përkasin tradhtisë së çështjes palestineze.
Khalaf al-Habtoor ka qenë i njohur prej vitesh për pikëpamjet e tij në mbështetje të normalizimit të marrëdhënieve me Izraelin. Pasi Abu Dhabi dhe Tel Aviv nënshkruan një marrëveshje muajin e kaluar për të normalizuar marrëdhëniet midis dy vendeve, Al Habtoor Group i miliarderit njoftoi një seri kontratash me kompani izraelite për të kryer aktivitete të përbashkëta tregtare në fusha të ndryshme, përfshirë udhëtimet ajrore dhe automjete të automatizuara.
Në fund të vitit të kaluar, Al-Habtoor, në një intervistë me revistën e komunitetit hebre në Shtetet e Bashkuara, u bëri thirrje shteteve të Gjirit për të normalizuar marrëdhëniet me Izraelin dhe shprehu publikisht një dëshirë për të vendosur marrëdhënie me Tel Aviv-in.
Miliarderi emiratas shtoi në një intervistë se “arabët dhe hebrenjtë janë kushërinj dhe se është budallallëk të luftosh”, duke shtuar se ai dëshiron që marrëdhëniet e Emirateve të Bashkuara Arabe me Izraelin të jenë të hapura dhe se secili prej tyre mund të përfitojë politikisht dhe ekonomikisht nga ato marrëdhënie. /tesheshi.com/
