Java e tretë e kampionatit italian, e nisur dje me fitoren 3-1 të Juventusit ndaj Sasuolos, të ndjekur nga triumfi absolut, 0-3, i Napolit në transfertën ndaj Palermos, ka vijuar sot me një sërë takimesh të tjera.
Rezultati më befasues është humbja e Milanit në shtëpi ndaj Udinezes. Një gol i minutës së 88-të u ka dhënë fitoren miqve. Humbja 0-1 është e dyta rresht për Milanin, me vetëm 3 pikë tani në tre javë.
Roma ka fituar 3-2 ndaj Sampdorias, dhe sërish falë kapitenit të saj, Totti-t, që rikthehet të bëjë protagonistin edhe pse është në fund të karrierës. 11-metërshi i realizuar prej tij në minutën e 93-të ka bërë që Roma të fitojë një ndeshje të mundimshme për të.
I huazuar te Torino, portieri i përfaqësueses angleze, nuk ka patur sot atë debutim që do të kishte dëshiruar.
Ashtu siç dje, Claudio Bravo, kiliani që i zuri vendin te Mançester Siti, gaboi rëndë në disa raste, posaçërisht në golin e ekipit kundërshtar, të njëjtën gjë bëri sot Hart. Dalja e tij e gabuar i kushtoi shtrenjtë Torinos.
Atalanta fitoi 2-1 ndaj Torinos, dhe në humbjen e torinezëve pati pjeën e tij natyrisht dhe Joe Hart.
Në takimet e tjera, Bolonja fitoi 2-1 ndaj Kaljarit, Kievo e Lacio u ndanë në barazim 1-1, ndërkohë që Xhenova – Fiorentina u pezullua për shkak të rreshjeve të rrëmbyera.
Sonte në mbrëmje luhet takimi Peskara – Inter, për ta mbyllur javën të hënën sfida Empoli – Krotone. /tesheshi.com/
