“Më duket se Perëndimi vazhdon të mbyllë sytë para faktit se Ballkani Perëndimor mbetet një fuçi baruti”, ka thënë ish-presidenti i Sllovenisë, Milan Kuçan në një intervistë për gazetën Pobjeda.
Ai ka theksuar se duke insistuar në interesat e kapitalit, Evropa, për fat të keq, shpesh injoron vlerat etike që formojnë bazën e idesë evropiane.
“Kam përshtypjen se Brukseli në masë të madhe nuk njeh situatën në Ballkanin Perëndimor, andaj krijohet përshtypja se politika të cilën e zbaton ajo nuk është përherë parimore. Përveç Bosnjës, Kosova sot është pika kryesore nevralgjike e Ballkanit”, tha Kuçan.
Ish-presidenti slloven beson se problem i Ballkanit mbetet edhe Maqedonia. “I vetmi vend që deri më tani ka arritur të shpëtojë nga ky kazan është Mali i Zi”, tha Kuçan.
Ai ceku dhe një tjetër problem, duke thënë se arsyeja për relativizimin dhe mohimin e anti-fashizmit në ish-Jugosllavi mund të gjendet në faktin se nuk ka një komb të vetëm jugosllav gjatë Luftës së Dytë Botërore që nuk u kursye nga tradhëtia dhe bashkëpunimi me forcat pushtuese. /tesheshi.com/
