Deputeti i NISMA-s, Milaim Zeka, ka sqaruar gjatë seancës në Kuvendin e Kosovës, incidentin që e ka pasur me deputetin e VV-së Frashër Krasniqin.
Ai tha se nuk ka frikë nga askush, se mund ta godasë shpullë edhe Albin Kurtin, i cili sipas Zekës, po i ndërsen, zagarët kundër tij, por nuk është rrugaç që ta bëjë një gjë të tillë.
“Unë nuk jam Kadri Veseli që ju duron për të shkatërruar gjithçka, unë nuk ju duroj. Mua s´më ndal askush, as me dhunë. Unë mund të godasë me shuplakë edhe Albin Kurtin, por s´jam rrugaç”, ka thënë Zeka duke akuzuar edhe Rexhep Selimin i cili e ka mbrojtur deputetin Krasniqi.
Ai shtoi se do të vijë koha kur do të shpalosë dosjen për Vetëvendosjen dhe takimet e tyre, siç ka thënë ai, me bosët e shërbimit sekret serb në Beograd.
“Do ju publikoj dosjet. Ju flisni shqip, por jemi më të zi sesa Lista Serbe”, ka deklaruar Zeka.
Ai i ka kërkuar falje publikisht deputetes së LDK-së Besa Gaxherrit, të cilën e kishte ofenduar kohë më parë.
Zeka para Kuvendit gjithashtu ka thënë se në rast se Lista Serbe shantazhon programin dhe zhvillimin e Kosovës, ai dhe partia e tij do të dalin kundër qeverisë. /tesheshi.com/
