Nurusulltan Nazarbajev, Presidenti i Kazakistanit që prej vitit 1991, si dhe njeriu më i fuqishëm i rajonit pas Putinit, është pritur si hero në Serbi, ku i është dhënë dhe medalja e “Shën Sava e klasit I”, e cila, e dhënë nga Kisha Ortodokse Serbe, përfaqëson një dekoratë mjaft me peshë në Serbi. Medaljen ia ka dorëzuar vetë Patriarku Irinej.
Siç bën të ditur agjencia zyrtare e lajmeve Tanjug, të gjithë zyrtarët serbë që kanë pritur Nazarbajevin e kanë falënderuar atë që Kazakistani nuk e ka njohur Kosovën.
Ja ç’shkruhet në Tanjug: “Kryeministri Aleksandër Vuçiq, falenderoi Nazarbajevin për gjithçka vendi i tij ka bërë për të mbështetur nismat ndërkombëtare të Serbisë, si dhe për mbajtjen e një pozicioni parimor për ruajtjen e integritetit territorial të Serbisë duke mos njohur pavarësinë e njëanshme të Kosovës”.
Po ç’hyn këtu Behgjet Pacolli?
Miliarderi shqiptar është një nga miqtë më të afërt të presidentit Nazarbajev.
Mabetex-i i Pacollit dhe shumë punëtorë shqiptarë e firma nënkontraktore kanë ndërtuar Kazakistanin dhe ndërtesat moderne shtetërore aty, në veçanti të gjithë kryeqytetin e ri Astana, i cili ka zëvendësuar Almaata-n.
Dy vjet më parë, Pacolli çoi Edi Ramën në Astana për t’i treguar ndërtimin e Teatrit të Operas si xhevahir ndërtimi.
Pacolli në këtë marrëdhënie padyshim që ka hyrë si biznesmen e jo për politikë; por i njohur për lobimin e njohjes së Kosovës në botë, shtrohet çështja se pse këtë nuk e ka bërë në vendin ku ushtron aktivitetin më të madh?!
Padyshim që të gjithë presin një shpjegim nga zoti Pacolli.
Vizita në Beograd e mikut të tij, ngjan si një thikë pas shpine për njeriun që u emërua vetëm për një muaj si President i Kosovës… /tesheshi.com/
