Lëvizja e protestës Ndal Koalicionit të Luftës nxori mijëra njerëz dje në rrugët e Londrës për të kundërshtuar planet e qeverisë britanike për t’iu bashkuar sulmeve ajrore kundër ISIS-it në Siri.
Nisma e qeverisë britanike, e shprehur nëpërmjet fjalëve të kryeministrit David Cameron të enjten e shkuar, “Kërcënimi i interesave dhe i popullit tonë është i tillë që ne nuk mund të qëndrojmë mënjanë dhe të mos veprojmë,” pritet të votohet në parlament javën që vjen.
Më së paku 4.000 protestuesit në Londër shprehën kundërshtinë e tyre të hapur ndaj bombardimit të Sirisë, duke mbajtur në duar pankarta ku shkruhej, “Mos e bombardoni Sirinë”, “Mos i shtini benzinë zjarrit.”
Drejtuesi i lëvizjes, Andrew Murray, u bëri thirrje demonstruesve të vihen në krah të udhëheqësit të laburistëve, Jeremy Corbyn-it, i cili e ka shprehur hapur qëndrimin e tij kundër sulmeve ajrore.
“Ky është një konflikt që nuk mund të zgjidhet me bombardime,” tha ai para masës së madhe të njerëzve.
Protesta të ngjashme u zhvilluan dhe në qytete të tjera të Anglisë. /tesheshi.com/
