Palestinezë nga Bregu Perëndimor e nga Jerusalemi Lindor janë mbledhur dje në xhaminë el-Aksa për të falur namazin e xhumasë së parë të muajit të madhëruar të Ramazanit.
Mbi 100.000 besimtarë palestinezë kanë qenë të pranishëm në faljen e xhumasë. Një numër relativisht i lartë, por shumë më i vogël në krahasim me 250.000 besimtarët pjesëmarrës në vitin e kaluar.
E kjo u dedikohet masave të shtuara të kontrollit nga ana e forcave izraelite të sigurisë, që i kanë shtuar pikat e kontrollit rreth kompleksit të xhamisë el-Aksa.
Përveç bllokuesve të rrugëve, janë dislokuar dhe rreth 3.500 forca policore në hyrjet e Qytetit të Vjetër të Jerusalemit.
Meshkujt mbi 45 vjeç, fëmijët nën 12 vjeç, e gratë e çdo moshe, janë lejuar nga forcat izraelite të sigurisë të hyjnë pa leje hyrjeje në Jerusalemin Lindor.
Ndërsa është pritur që në këtë xhuma të parë të Ramazanit të ketë mbi 300.000 besimtarë palestinezë në xhaminë el-Aksa, masat izraelite të sigurisë e kanë kufizuar fort këtë numër.
83.000 palestinezëve të Bregut Perëndimor iu anuluan lejet e hyrjes të enjten nga autoritetet izraelite pas një sulmi me armë një natë më herët në Tel-Aviv, që la të vdekur katër izraelitë. /tesheshi.com/
