Më shumë se 10.000 islandezë janë shprehur në rrjetin social Facebook se do t’i mirëpresin refugjatët sirianë në shtëpitë e tyre.
Pasi qeveria islandeze deklaroi muajin e shkuar se do të pranonte vetëm 50 refugjatë nga Siria, autorja islandeze Bryndis Bjorgvinsdottir i nxiti bashkëqytetarët e saj të shpreheshin në favor të atyre që u nevojitej azili.
Pas fushatës të nisur prej saj, 10.000 islandezë deklaruan në Facebook brenda 24 orëve se do t’u ofronin refugjatëve shtëpitë e tyre, e po ashtu u kërkuan organeve qeverisëse të bëjnë më shumë për të gjendurit në nevojë.
Gatishmëria e qytetarëve islandezë ka vënë në lëvizje dhe qeverinë, që po sheh mundësitë për ta rritur kuotën e refugjatëve që do të priten.
Sipas ministres së Mirëqenies Sociale, Eyglo Hardardottir, autoritetet vendase po i shqyrtojnë ofertat e bëra në Facebook, e do ta marrin në konsideratë shtimin e numrit të refugjatëve të pranuar. “Ne do të shqyrtojmë çdo rrugë të mundshme për mirëpritjen e më shumë refugjatëve,” bëri të ditur ajo.
Ndërsa në mjaft vende të Europës janë parë shpesh këtyre ditëve skena të keqtrajtimit të refugjatëve, gjesti i qytetarëve islandezë është krejtësisht në kundërshtim me to. /tesheshi.com/
