Siç raportojnë organizata të ndryshme, sulmet ajrore ruse në Siri përgjatë gjashtë muajve u kanë marrë jetën mijëra civilëve.
Tërheqja e pjesshme e forcave ruse, e shpallur në mes të marsit, ka çuar në një rënie prej 70 për qind të aktiviteteve ku ato kanë marrë pjesë e që kanë rezultuar me viktima civile; nga 165 aktivitete luftarake në shkurt me përfshirjen e forcave ruse, ky numër zbriti në 45 në mars. Megjithatë, fushata ruse nuk ka marrë fund tërësisht, dhe sulmet ajrore ka gjasa të vazhdojnë.
Observatori Sirian i të Drejtave të Njeriut do të raportonte këtë javë se ka qenë në gjendje të konfirmojë vdekjen e 5.081 luftëtarëve dhe civilëve si rezultat i fushatës ruse në Siri.
Nga ky numër, 1.869 e të vrarëve nuk ishin luftëtarë, ku përfshihen 446 fëmijë e 278 femra. 1.586 të tjerë nga të vrarët ishin meshkuj jo të përfshirë në luftime.
Ndërsa sipas shifrave të grupit monitorues Airwars, me qendër në Britani, numri i viktimave civile nga përfshirja ruse vetëm në tre muajt e parë të fushatës së saj ajrore ishte gjashtë herë më tepër se ai i atribueshëm forcave të koalicionit të udhëhequr nga SHBA-të për të njëjtën periudhë kohore.
Një raport i këtij grupi i publikuar gjatë marsit e jep numrin e viktimave civile nga sulmet ruse prej 30 shtatorit deri në 31 dhjetor të vitit të shkuar midis 1.098 dhe 1.450 personave. /tesheshi.com/
