Shefi i dorëhequr i Drejtorisë së Sigurisë dhe Kundërzbulimit, Sasho Mijallkov, 50 vjeçar karrierën e tij e ka filluar në administratë në vitin 1998, duke ndjekur hapat e babait të tij Jordan Mijallkov i cili ishte ministër i parë i punëve të Brendshme në Maqedoninë e pavarur. Babai i Sasho Mijallkov vdiq në një aksident trafiku në vitin 1991.
Karriera e tij në postin e Drejtorit të shërbimit sekret arriti kulmin kur në pushtet erdhi VMRO-DPMNE në vitin 2006 ku sipas ekspertëve u formua treshja më e fortë Sasho Mijallkov, kushëriri i tij kryeministri Nikolla Gruevski dhe kumbari i kryeministrit, Zoran Stavrevski ku shpesh edhe quhet si ‘familja’.
Kompanitë në Republikën Çeke
Sasho ka ndjekur hapat e babait të tij edhe në biznes. Mijallkov e ka rihapur kompaninë në Republikën Çeke në vitin 1993 së bashku me vëllain e tij. E quajnë ‘Mijakov s.r.o’ dhe më vonë e riemëruan ‘Efishensi s.r.o’ që merrej kryesisht me patundshmëri. Nga viti 2008 Mijallkov është pronar i vetëm i kompanisë. Kjo kompani posedon edhe apartament në qendër të Pragës.
Kjo pronë sipas kadastrës së Republikës Çeke është blerë në vitin 2001 ndërsa vlera e saj vlerësohet të jetë 235 mijë dollarë.
Si pjesë e ‘Efishensi’ është edhe kompania ‘Stajl Feshn s.r.o’, ‘Mirtlanis’, dhe kompani e cila deri pak kohë më parë ishte në pronësi të Mijallkov ‘Tasiga Korp’ nga Panama.
Kompania e katërt ‘Servis Point MM s.r.o’ është likuiduar në vitin 2013 pasi kjo kompani arriti të ndërtojë 50 apartamente luksoze në Mihle në Pragë.
Vendi ku ndërtohen këto apartamente e siguron Mijallkov, investimi është me vlerë prej 500 mijë dollarëve. Mijallkov posedon edhe apartament të vetin në këto ndërtesa që nuk është regjistruar në komision.
Këto të dhëna janë publikuar nga Projekti për raportim të krimit dhe korrupsionit (The Organized Crime and Corruption Reporting Project (OCCRP) së bashku me NOVA nga Maqedonia dhe Qendrën për gazetari hulumtuese nga Çekia zbulojnë se Mijallkov ka investuar miliona në patundshmëri të shtrenjta në Pragë.
Ai njihet edhe si person shumë i afërt me disa biznese shqiptare dhe politikanë shqiptarë. Një pjesë e bashkëpunimit dhe lidhjeve të tij u publikua me aferën e përgjimeve në Maqedoni. Por ai konsiderohet si personi më i famshëm që kishte arritur që të ketë kontroll të fuqishëm mbi skenën politike shqiptare, bizneset dhe grupet e ndryshme kriminale. /tesheshi.com/
