Mihal Kokëdhima, për të cilin Gjykata e Vlorës dha arrest me burg, ka dhënë versionin e tij mbi skenën hollivudiane ku u gjend, sipër kofanos së një furgoni, duke thyer xhamin e përparëm të saj.
“Nuk kam bërë asnjë gjë t’i sulmoja ata. U mundova t’i ndaloja. Ata nisën makinën dhe desh më shtypën. Ju luta gjithë rrugës të ndalonin, por ata nuk ndaluan. Kur ndaluan zbrita nga makina dhe shkova vetë lajmërova policinë dhe shkova në polici.
Më morën zvarrë me makinë. Ç’është kjo punë, nuk kam prekur njeri me dorë. Ku janë faktet që i preka me dorë? Më rrëzuan në Qeparo nga makina. Si ka mundësi, unë nuk e theva xhamin për t’i dëmtuar por për tu mbajtur. Unë u mora targën, telefonova policinë. Ata futën marshin të më shtypnin dhe unë u hodha në kroskot”, tha Kokëdhima në sallën e gjyqit, duke tentuar të mbrojë veten nga akuzat.
Pamjet e shfaqura një ditë më parë në disa media, ku ai, nga restoranti i tij në Porto Palermo e deri në Qeparo, qëndronte mbi kofano në ecje, bën xhiron e rrjeteve. Ai thyente xhamin e përparëm e klithte, herë duke kërcënuar shoqëruesit shqiptarë të turistëve spanjollë e herë duke paralajmëruar vdekjen e tij të mundshme në ato rrethana, nëse automjeti nuk do ndalonte. /tesheshi.com/
