Aviacioni ushtarak i Serbisë, me aeroplanët e tij supersonik Mig 29, ka kohë që është duke e shkelur hapësirën ajrore të Kosovës.
Sipas një burimi kofidencial që e servir këtë fakt për tesheshi.com, rasti më i fundit kur ka ndodhur kjo është nata e 28 nëntorit 2015, pra 5 muaj më parë.
“Aeroplanë supersonik të ushtrisë së Serbisë, gjuajtës dhe bombardues të llojit Mig 29, kanë shkelur hapësirën ajrore të Kosovës më 28 nëntor 2015 rreth orës 01: 30, në zonën e Kamenicë-Gjilanit”, ka thënë burimi.
Ndërkohë që konfirmohet dhe fakti se hapësira ajrore e Kosovës monitorohet 24 orë pa ndërprerje nga ana e serbëve me aeroplanë pa pilot të prodhimit rus, të cilët ngrihen nga aeroporti ushtarak i Nishit.
Si rregull, hapësirën ajrore të aviacionit civil në Kosovë, në bazë të një marrëveshjeje e kontrollon Hungaria, deri në 9 km lartësi; ndërsa mbi këtë lartësi e kontrollon NATO-ja, përmes dy bazave të radarëve të kësaj aleance ushtarake të cilat gjenden në Greqi dhe Kroaci.
Burimi ka shtuar se pas dyshimeve se Serbia ka shkelur me aeroplanë luftarakë hapësirën ajrore të Kosovës, zyrtarë të KFOR-it në Prishtinë në fillim kanë pretenduar për pavërtetësi të këtij fakti, me pretendimin se ushtria e Serbisë, përkatësisht aviacioni luftarak i saj nuk ka teknologji që aeroplanët serbë të fluturojnë natën.
“Mirëpo pas një kohe, dikush nga eprorët e KFOR-it thekson se kjo është e mundur pasiqë Serbia ka në dispozicion disa aeroplanë luftarak të prodhimit rus, Mig 29 që kanë teknologjinë e duhur për të fluturuar në çdo kohe, edhe natën, dhe në kushte shumë të vështira atmosferike”, ka saktësuar burimi.
Por ky i fundit shton se e gjitha ka përfunduar deri këtu, pasi zyrtarë të KFOR-it në Kosovë, asnjëherë nuk i kanë bërë kërkesë selisë së NATO-së, në Bruksel që t’i ofrojë të dhënat nga ana e bazës tjetër ushtarake të NATO-së që është e vendosur në Spanjë, e ku lexohen ato që vijnë nga bazat e radarëve që janë në Greqi dhe Kroaci.
Në anën tjetër, zyrtarë të KFOR-it rreth kësaj çështje nuk janë prononcuar, edhe pse portali tesheshi.com ka kohë që përmes postës elektronike iu është adresuar me pyetje.
E siç u cek më sipër, që gjithashtu është shkruar kohë më parë, hapësira territoriale e Kosovës monitorohet 24 orë pa ndërprerë nga ana e aeroplanëve të Serbisë pa pilot, e që ngrihen pra nga baza ushtarako serbo-ruse në Nish.
Por, kohët e fundit po vihet re dhe një tjetër fenomen, ai i dronëve që fluturojnë, sidomos mbi Dragodan, atje ku ndodhen selia e KFOR-it dhe selitë diplomatike të Perëndimit në Prishtinë.
Në kofidencë thuhet se KFOR, në disa raste ka bërë që me armë dhe mjete të tjera të rrëzojë disa dronë që kanë qenë duke fluturuar pikërisht në këtë zonë.
Por burimi nuk ka mundur të specifikojë se të kujt janë këtë dronë dhe për çfarë arsye kohëve të fundi ka shtim të tyre mbi Dragodan.
Kujtojmë që serbëve, droni u është shndërruar në makth me përmasa nacionale, fill pas ndeshjes me përfaqsuesen shqiptare në Beograd, tetorin e 2014-ës, ku një dron me një flamur të sajuar të Shqipërisë etnike fluturoi mbi kokat e tyre duke prvokuar një zemëratë dhe reagime esktreme.
M.Mustafa – /tesheshi.com/
