Hristijan Mickoski u rizgjodh në krye të partisë më të madhe opozitare në Maqedoninë e Veriut, VMRO-DPMNE.
Nga 493 delegatë që morën pjesë në Kongresin e 17-të të kësaj force, votuan 492, prej tyre 489 për Mickoskin.
Mickoski në fjalimin e tij pas rizgjedhjes paralajmëroi një politikë të re, një koncept të ri të unitetit, të cilin e quajti “Marrëveshja e Re”.
“Një marrëveshje e tillë shoqërore që do të ofrojë patriotizëm të përbashkët është një rikthim në shpresat tona se si duhet të duket shteti në momentet kur u krijua, si një grup aktiv aktorësh të barabartë, që do të sigurojë përparim të drejtë dhe mundësi të barabarta për të gjithë”, tha Mickoski.
Ai paralajmëroi edhe një pozicionim të ri strategjik ndaj të gjitha komuniteteve të tjera që janë pjesë e kombit maqedonas, ulje të tatimit mbi të ardhurat personale dhe tatimit mbi fitimin në 8 për qind, taksën për të rinjtë në zero për qind, papunësi njëshifrore, luftë kundër korrupsionit, tejkalim të ndarjeve.
Ai kërkoi patriotizëm të përbashkët dhe bëri thirrje për mobilizimin e çdo individi krijues.
“Bëhuni gati, kemi shumë punë për të bërë. Populli ka pritshmëri nga ne dhe ne duhet t’i përmbushim ato. Populli kërkon zgjedhje. Ne nuk duhet të zhgënjejmë, nuk duhet të dështojmë, duhet të kemi sukses”, tha Mickoski. /tesheshi.com/
