Michelle Obama ndau frikën, mendimet dhe shqetësimet e saj gjatë një interviste me Jay Shetty, ku e pyetur nga prezantuesi “çfarë po të mban zgjuar natën tani ose cila është frika jote më e madhe tani që ke provuar kaq shumë’, Michelle thotë: “Ka të bëjë më pak për mua personalisht dhe më shumë për botën në të cilën ndodhemi”.
Duke folur për kohën e saj si Zonjë e Parë e SHBA-së, ajo tha: “Kur je e martuar me presidentin e Shteteve të Bashkuara, i cili di gjithçka për gjithçka në botë – ndonjëherë dëshiron të mos e dish”.
Avokatja dhe autorja përmendi një sërë shqetësimesh specifike që ajo ka, duke përfshirë luftërat e vazhdueshme, efektet e mundshme të inteligjencës artificiale tek njerëzit dhe ndryshimet klimatike.
Duke folur për zgjedhjet e ardhshme presidenciale në SHBA, Michelle Obama tha:
“Çfarë do të ndodhë në zgjedhjet e ardhshme? Unë jam e tmerruar nga ajo që mund të ndodhë, sepse udhëheqësit tanë kanë rëndësi. Cilin zgjedhim, kush flet për ne, kush e mban atë detyrë, ndikon tek ne në mënyra që ndonjëherë mendoj se njerëzit i marrin si të mirëqenë….Këto janë gjërat që më mbajnë zgjuar”, shtoi 59-vjeçarja Michelle Obama. /tesheshi.com/
