Presidenti Meta ka bërë një hap që konsiderohet si një paralajmërim për dekretimin e Sandër Lleshit si ministër i Brendshëm. Kur mbeten dhe pak orë nga skadimi i afatit kushtetues, kreu i shtetit e ka zhveshur të emëruarin e Ramës nga rroba ushtarake duke e ç’dekretuar si general, që ishte njëherësh një nga pretendimet e tij si pengesë për dekretim.
“Në mbështetje të nenit 93, të Kushtetutës, të nenit 9, pika 3, shkronja “g”, të ligjit nr. 64/2014, “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”, i ndryshuar, të nenit 26 pika 1, shkronja “ç”, të ligjit nr. 59/2014 “Për karrierën ushtarake në Forcat e Armatosura të Republikës së Shqipërisë”, me propozim të Ministrit të Mbrojtjes nr. 8210/1 prot., datë 15.11.2018,
D e k r e t o j
Neni 1
Gjeneral Brigade Sandër Ndue Lleshaj, nxirret në lirim.
Neni 2
Ky dekret hyn në fuqi menjëherë”, thuhet në njoftimin e Presidencës.
Ditë më parë, këtë kërkoi dhe Rama në një status në rrjete; që ta ç’dekretonte si ushtarak e ta dekretonte si ministër. /tesheshi.com/
