Presidenti Meta ka marrë pjesë në një “Mëngjes Lutjeje” të Jerusalemit, organizuar me videokonferencë, ku ka mbajtur dhe një fjalim.
Veç vlerësimit klasik për atë çfarë shqiptarët bënë për hebrenjtë gjatë luftës së Dytë Botërore, duke i fshehur nga nazistët e trajtuar me humanitet, kreu i shtetit është futur dhe në çështje teologjike, duke potencuar atë që hebrenjtë janë populli i zgjedhur i Zotit, e si të tillë, Zoti i mbrojti me anë të shqiptarëve.
“Kujtimi i trimërisë së “Njerëzve të drejtë mes kombeve” duhet të mbahet mend dhe të çmohet si një shenjë e mbrojtjes nga ana e Zotit të Plotfuqishëm për popullin e tij të zgjedhur.
Ka një thënie të shenjtë se: Ai që shpëton qoftë edhe një jetë njerëzore, ka shpëtuar botën mbarë!
Ç’është e vërteta, Zoti është treguar dashamirës për kombet tona tona dhe na ka bekuar me paqe dhe liri në tokat tona”, tha Meta.
Ai më pas, pos që vlerësoi faktin se Kosova do ketë ambasadë në Izrael, të cilën do e çojë në Jerusalem, një akt që pjesa më e madhe e Perëndimit dhe pothuajse gjithë bota islame nuk e pranon, kërkoi që edhe ta bekojë Izraelin, sigurisht dhe Shqipërinë.
“I kemi mirëpritur zhvillimet më të fundit mes Shtetit të Izraelit dhe vëllezërve tanë në Kosovë.
Do të donin ta shfrytëzonim këtë rast për të falënderuar edhe udhëheqjen e miqve tanë të përbashkët në Shtetet e Bashkuara për arritjen e kësaj marrëveshjeje historike.
Në librin e profetit Jeremia, shkruhet se ne duhet të “Kërkojmë paqen në qytetin, në të cilin ju kam caktuar të jetoni si dhe t’i falemi Zotit për të; sepse në paqtimin e qytetit ju do të gëzoni edhe paqen tuaj!”
Zoti i Plotfuqishem le ta bekojë Izraelin, Shqipërinë e të gjitha kombet dhe t’i sjellë paqe dhe mirëqenie qytetit të Jeruzalemit si dhe të gjitha qytetet ku ju ka përcaktuar të jetoni”, theksoi presidenti. /tesheshi.com/
