Presidenti Meta e ka nisur ditën duke përcjellë një urim edhe politik për 8 Dhjetorin, “Ditën e Rinisë” të shpallur njëanshmërisht nga PD pak vite më parë në kushte pushteti, e që lidhet me datën e daljes së studentëve në protesta duke kërkuar ndryshimin e regjimit, këtu e 28 vite më parë.
“Mirënjohje të gjithë studentëve, të rejave e të rinjve, të cilët 28 vite më parë vërshuan në rrugët dhe sheshet e Tiranës, me thirrjen që kumbonte nga gjokset e tyre rinore “E duam Shqipërinë si gjithë Europa” dhe “Liri-Demokraci”, për të shndërruar 8 Dhjetorin në Ditën e tyre, Ditën e Rinisë, Ditën e Lirisë, Ditën e Europës”, shkruan Meta, i cili më pas veçon emrin e të ndjerit Hajdari si prijës i studentëve.
“Kujtojmë me nderim veprën e Azem Hajdarit, liderit të Lëvizjes Studentore, i cili me guxim, kurajo e shpirt sakrifice frymëzoi ato minuta e orë vendimtare për mijëra studentë, të rinj, pedagogë e intelektualë, për të kthyer në Shqipëri lirinë e munguar”, shprehet Meta.
Dhe dhe më pas bën një lidhje me aktualitetin, duke iu referuar protestave studentore të këtyre ditëve.
“Jehona e thirrjeve “Liri-Demokraci” dhe e “E duam Shqipërinë si gjithë Europa” të 8 dhjetorit 1990 është ende një aspiratë, jo plotësisht e realizuar.
Inkurajoj dhe mbështes rininë e sotme, veçanërisht studentët, të cilët me shpirtin e tyre të lirë, energjinë, guximin e kurajon e pashembullt të marrin aktivisht pjesë në proceset demokratike për europianizimin e plotë të vendit dhe për ndërtimin e një të ardhmeje të sigurtë të tyre në Shqipëri”, përfundon Meta mesazhin e tij. /tesheshi.com/
