Presidenti Meta u shpreh për herë të parë mbi tarifën doganore 100 përqind vënë nga qeveria “Haradinaj” ndaj Serbisë dhe Bosnjës, duke folur për median e kësaj të fundit.
Për Metën, ajo tarifë duhet hequr.
“Kur ata vendosën të vinin taksën nuk më pyetën, por unë nuk jam pro shtimit të barrierave në marrëdhëniet midis vendeve në rajon, sepse e ardhmja duhet të jetë bashkëpunim i hapur dhe pa kufij dhe pa pengesa. Ne të gjithë synojmë të bëhemi pjesë e Bashkimit Europian. Ndaj shpresoj që Kosova të shqyrtojë sa më shpejt që të jetë e mundur mundësinë e përmirësimit të mëtejshëm të tregtisë dhe marrëdhënieve të përgjithshme, jo vetëm me Bosnjën, por edhe me Serbinë. Kjo do të ishte shumë e dobishme”, tha Meta, duke i bërë njëherësh thirrje Beogradit që të ndalojë fushatën kundër Kosovës në planin ndërkombëtar.
Gjithashtu, duke folur mbi raportet shqiptaro-serbe, Meta kujtoi se ai ishte i pari kryeministër që vizitoi Beogradin në 2002-in. “Kam bërë maksimumin në karrierën time politike për të promovuar marrëdhëniet mes të gjitha vendeve në rajon, përfshirë edhe Serbinë. Kam qenë Kryeministri i parë i Shqipërisë, që kam takuar asokohe ish-Kryeministrin e ndjerë, Zoran Gjingjiç në përpjekje për të krijuar një epokë të re marrëdhëniesh mes Serbisë dhe Shqipërisë, por në përgjithësi mes shqiptarëve dhe serbëve”, tha Meta.
E sa për debatin e Schengenit rajonal, ai dha mbështetje mbi projektin.
“Ne kemi kaq shumë platforma rajonale bashkëpunimi. Çdo platformë rajonale bashkëpunimi, që është gjithëpërfshirëse, është e mirëpritur. Kjo duhet të ishte një parakusht për të promovuar dhe konsideruar iniciativa rajonale premtuese dhe të dobishme. Iniciativa që ndihmojnë bashkëpunimin tonë janë gjithmonë të mirëpritura, por jo duke provokuar debate të panevojshme, duke u përpjekur për të margjinalizuar dikë ose një vend, apo t’i japësh protagonizëm dikujt tjetër. Vetëm partneriteti dhe gjithëpërfshirja mund të rrisë besimin mes vendeve, mes njerëzve dhe mund të reduktojë dhe eliminojë të gjitha barrierat, qofshin ato legale, administrative apo burokratike në rajonin tonë”,theksoi kreu i shtetit.
Kujtojmë se me këto qëndrime, Meta del kundër mikut e aleatit të tij të ngushtë politike, Ramush Haradinaj. /tesheshi.com/
