Presidenti Meta nuk ka pranuar të shkarkojë Rektorin Koni, siç qeveria – ministrja e Arsimit Besa Shahini ia kërkoi pas pezullimit.
Kreu i shtetit, për të qenë sa më argumentues në refuzimin e tij, thotë se për problemet në zbatimin e Ligjit të Arsimit të Lartë nuk mundet të ketë përgjegjësi Rektori, gjersa ka qenë mosnxjerrja e akteve nënligjore shkaku i problemeve
“Mosnxjerrja e akteve nënligjore në kohë ka krijuar terren që në institucionet e arsimit të lartë, pra edhe në Rektoratin e Universitetit të Tiranës, të krijohen situata që prodhojnë konflikte midis strukturave akademike dhe administrative. Në këtë situatë të rrëmujshme rregulluese, çdo pretendim se përgjegjës për shkeljet e ligjit nr.80/2015 apo akteve nënligjore është vetëm Rektori i Universitetit të Tiranës, nuk është aspak objektiv. Propozimi duket sikur kërkon ta faturojë gjithë përgjegjësinë për gjendjen e sistemit arsimor tek Rektori i Universitetit, gjë e cila nuk është e drejtë në situatën e krijuar”, arsyeton presidenti.
Kështu, Meta ka marrë një tjetër pozicionim refuzues ndaj qeverisë, në vazhdën edhe të përplasjeve në rastin dekreteve për disa ministra. /tesheshi.com/
