Presidenti Ilir Meta, gjatë një vizite në Nju Jork, ka marrë pjesë në një meshë të mbajtur në kishën katolike shqiptare “Zoja e Shkodrës”. I ardhur nga Vatikani ku pati një takim me Papa Françeskun, kreu i shtetit shqiptar u përcolli atyre mesazhet e marra prej aty.
“Nder dhe privilegj të takoja në Vatikan, Atin e Shenjtë Papa Françesku. Kënaqësi e jashtëzakonshme, për të dëgjuar lutjet e bekimet e tij për kombin tonë. Porosia e Atit të Shenjtë, për të forcuar harmoninë tonë ndërfetare. Porosia e Papës ishte që të bëjmë çdo gjë që Shqipëria të mos pësojë ‘dimrin demografik’ të Europës”, tha Meta.
Dhe, duke u ndalur te figura e Skënderbeut, që për katolikët shqiptarë përfaqson edhe një “Atlet Krishti”, Meta tha se falë atij heroi, shqiptarët nuk u asimiluan dhe ekzistuan si komb. /tesheshi.com/
