Presidenti Meta infirmoi opinionin mbi një takim që ka patur me Janullatosin, ku citoi një thënie të tij nga e cila ka mbetur me mbresa të thella dhe kuptohet lehtë pse – “E kundërta e paqes nuk është lufta, por egocentrizmi”.
Me gjasë, një thënie e tillë, për Metën është një shuplakë për Ramën, ndonëse kreu i ortodoksëve jo domosdoshmërisht e ka patur me të .
“Kënaqësi të vizitoja sot dy ambientet e reja në Katedralen Ortodokse Ngjallja e Krishtit në Tiranë, sallën e pagëzimit dhe atë të edukimit dhe socializimit të të rinjve.
Edukimi i brezit të ri me mësimet e shenjta për paqen, dashurinë dhe jetën, nuk prekin vetëm zemrat e mendjet e besimtarëve brenda mureve të kishës, por janë mesazhe aktuale, sidomos për fëmijët e të rinjtë tanë, për t’i mbajtur larg veseve dhe ‘sëmundjeve të kohëve moderne’ siç janë droga, bixhozi, alkooli dhe egoizmi.
Me të drejtë Fortlumturia e Tij, Anastas Janullatos predikon se: ‘E kundërta e paqes nuk është lufta, por egocentrizmi’.
Mirënjohje dhe falenderim të veçantë për Kishën Ortodokse Autoqefale për kontributet dhe përkushtimin e veçantë për dekurajimin e fenomenit të shpopullimit të vendit, duke theksuar rëndësinë e rritjes së shpresës dhe promovimit të vlerave tona më të mira kombëtare, te fëmijët dhe të rinjtë tanë”, shkruan Meta. /tesheshi.com/
