Kreu i Parlamentit, Ilir Meta e ka cilësuar si me rëndësi për të ardhmen reformën në drejtësi. Duke folur sot për mediat nga Kryesia e Kuvendit ai tha se pas një pune të bërë në nivel ekspertësh vendas dhe të huaj pas investimit të Komisionit të Venecias, shtrohet çështja e miratimit të ndryshimeve kushtetuese, në mënyrë gjithëpërfshirëse dhe me konsensus sa më të gjerë pasi siç tha ai, nuk ka më kohë për të humbur.
“Nuk ka asnjë arsye të vonohemi në dakordësimin e tekstit përfundimtar të ndryshimeve kushtetuese. Tani është momenti që së bashku të punojmë për një përqasje sa më konsensuale. Qëndrimi përfundimtar i Komisionit të Venecias na nxit për një sistem gjyqësor efektiv që mbivendoset mbi çdo vullnet politik”, u shpreh Meta.
Kreu i Kuvendit foli për takticizma politike dhe dha për këtë edhe sqarimin përkatës.
“Nëse duam të krijojmë pretekste dhe alibi, apo takticizma politike, kjo nuk na bashkon dhe nuk na çon drejt konsensusit. Duhet të çojmë përpara këtë reformë në interes të vendit. Çdo lëvizje që zhvendos debatin me qëllim apo pa dashje nga fokusi kryesor që është reforma në drejtësi është takticizëm politik”, deklaroi ai. /tesheshi.com/
