Ilir Meta ka lëshuar sërish një deklaratë të fortë sot, e cila duket se shkon drejt Edi Ramës që foli për një president të përbashkët Shqipëri-Kosovë, apo asaj të Thaçit për një shkëmbim territoresh së veriut të Kosovës me Luginën e Preshevës.
Në një takim me Carl Bild, Meta deklaroi se “Janë të papranueshme dhe të pamundura idetë destruktive për ndarje apo shkëmbime territoresh”.
Sipas njoftimit te Presidencës, Meta i ka konsideruar “tentativa të dëshpëruara për mbivendosjen e agjendave populiste mbi agjendat jetike të integrimit dhe stabilitetit”.
Ky reagim i Presidentit Meta vjen pasi gazetari dhe kryeredaktori i gazetës Express në Kosovë, Berat Buzhala tha se ka një skenar që do të vlejë vetëm për ndryshimin e kufijve të Kosovës por jo edhe të vendeve tjera ballkanike.
Buzhala, duke iu referuar deklaratës së zëvendëskryeministrit të Austrisë që ka propozuar një autonomi për Veriun e Kosovës, shkruan se “Hashim Thaçi, Edi Rama dhe Ali Ahmeti kanë biseduar për ndryshimin e kufijve në Ballkan”.
Meta theksoi rëndësinë që ka zgjerimi i BE-së edhe me 6 vendet e Ballkanit Perëndimor, dhe në këtë kontekst vuri në dukje se shpreson që Shqipëria të çelë sa më parë negociatat e anëtarësimit në BE, dhe që Kosova të përftojë liberalizimin e vizave, sapo të mbyllet marrëveshja e demarkacionit me Malin e Zi.
“Programi i vetëm i punës në tryezat e drejtuesve politikë duhet të jenë zgjidhja e problemeve e shqetësimeve reale të qytetarëve, për të vendosur sundimin e ligjit dhe demokracisë në secilin vend”, u shpreh Meta, thuhet ne njoftimin e Presidencës. /tesheshi.com/
