Në një dalje të radhës para gazetarëve, presidenti Meta u përbetua se më 8 dhjetor nuk do “largohet nga sheshi” pa një referendum. Sërish pa e specifikuar se për çfarë, ai tha se “nuk do të iki nga sheshi derisa t’i kthejmë së bashku popullit shqiptar të drejtën e referendumit që e ka në Kushtetutë, derisa të detyrojmë parlamentin dhe të gjithë të tjerët që të zbatojnë këtë detyrim kushtetues.
Ju them të gjithë qytetarëve: me këtë klasë politike jeni të pashpresë”, tha njeriu që mban detyrën e kreut të shtetit, që është aktiv afro çerekshekulli në politikë, e që është zgjedhur president nga mazhoranca aktuale, së cilës ai i ka hapur luftë.
Kaotik dhe i paqartë në arsyetime, Meta, edhe pse shpalli se në Shqipëri nuk ka më votime, këmbënguli te referendumi që është po ashtu një proces votimi
“Në Shqipëri nuk ka më votime, ka vetëm komandime kudo”, tha njeriu që mban postin e lartë të presidentit.
“Është bllokuar qëllimisht nga kjo klasë politike të mos e ushtrojë atë pushtet dhe demokracinë e drejtëpërdrejtë për të vendosur për të gjitha çështjet e rëndësisë së veçantë që ai gjykon dhe shpreh vullnetin. Kjo nuk do të thotë se mitingu i 8 dhjetorit do të jetë pa mbarim dhe do të vazhdojë një javë. Kjo do të thotë se në të gjitha sheshet e Shqipërisë kudo do të komunikojmë me popullin.
Nga sot Presidenti është palë me popullin dhe referendumin dhe do të bëjë çdo gjë derisa populli të marrë në dorë fatin e tij përmes referendumi në mënyrë që populli shqiptar të mos betet më në mëshirën e partive dhe të mos jetë më viktimë e lojërave të partive”, tha Meta. /tesheshi.com/
