Në fjalimin e tij të parë si president, Ilir Meta e ka çuar gjuhën aty ku dhemb dhëmbi: tek situata e tensionuar politike. Duke marrë shkas dhe nga gjakosja e politikës në fqinjin Maqedoni, Meta ka shprehur synimin për të kontribuuar, tashmë si kreu i shtetit, që kjo mos ndodh në Shqipëri.
“…të bëjmë çdo përpjekje për të gjetur konsensusin në mënyrë që Shqipëria të mos bëhej Maqedoni. Dje e keni parë të gjithë ngjarjen tronditëse në Kuvendin e Maqedonisë, të cilat vijnë për shkak të një konflikti, kokëfortësie politike të papranueshme. Ndaj unë edhe njëherë dua t’u apeloj të gjithëve të bëjmë çdo gjë për stabilitetin e vendit”, tha kreu i ri i shtetit.
Më pas, ai e ka mikluar opozitën, ish-aleatën e dikurshme për katër vjet, PD-në, që ta rishohë qëndrimin e saj për bojkot zgjedhjesh. “Shpresoj dhe besoj se ende ka kohë për të krijuar një atmosferë krejtësisht tjetër për zgjedhjet e ardhshme në mënyrë që edhe në 24 korrik, ditën kur do të betohet Presidenti që ju keni votuar sot, jo thjesht kjo sallë të jetë plot, por Shqipëria të jetë shumë më e qetë se sot dhe me një të ardhme europiane akoma më solide. Dhe këtë mund ta arrijmë vetëm duke punuar dhe bashkëpunuar të gjithë”, tha presidenti Ilir Meta. /tesheshi.com/
