Presidenti Ilir Meta nderoi me titullin “Nderi i Kombit” sportklub Vllazninë e Shkodrës, në përvjetorin e 100 të themelimit.
Ndodh kjo teksa futbolli i madh shkodran është në ditën më të errët të tij me rënien nga kategoria superiore, e cila ishte një shock për opinionin me sens të lartë krenarie të qytetit verior.
Gjithashtu, në një ceremoni gala, iu dha titulli “Kalorës i Urdhrit të Skënderbeut” ish-futbollistit Sabah Bizi; ndërsa me titullin “Mjeshtër i Madh” u nderuan çiklisti Agim Tafili, atletja Arbana Xhani, futbollistët e trajnerët Astrit Hafizi e Ramadan Rragami.
Ndërkohë u përurua edhe një memorial në këtë 100-vjetor, përcjellëme këto fjalë nga ana e presidentit Meta:
“Një ditë e mrekullueshme sot në Shkodër locen, djepin e qytetërimit tonë modern, kulturës, vlerave patriotike dhe ndjenjave të forta liridashëse, ku pata nderin e veçantë të vlerësoj me titullin e lartë ‘Nderi i Kombit’ Shoqërinë Sportive “Vllaznia” me rastin e 100-vjetorit të themelimit të saj.
Shumë i lumtur që në këtë ceremoni solemne të përuronim së bashku me kryebashkiaken, Voltana Ademi vendosjen e memorialit përkujtimor për të lënë të gdhendur nderimin për Vllazninë, sportistët e saj dhe bijtë e shquar të Shkodrës, të cilët aq shumë i kanë dhënë këtij qyteti dhe çështjes shqiptare”, u shpreh kreu i shtetit. /tesheshi.com/
