Presidenti Meta shënoi një rikthim te shpërthimet e tij të pazakonta me fokus Reformën në Drejtësi, ku në kontestim të saj, duke pretenduar në një anshmëri ndërkombëtare me krahmbajtje ndaj Ramës, akuzoi pikërisht ndërkombëtarët në Tiranë, po aq ashpër sa para krizës pandemike.
Përballë Fevziut në Opinion, Meta tha se “ndërkombëtarët nuk ma vënë dot mua gishtin”, referuar një deklatrate të ambasadores amerikane, e vijuar më tej duke thënë: “Atyre ndërkombëtarëve që janë bërë palë me Edi Ramën ua kam vënë gishtin sy më sy. Nëse ke ndonjë ndërkomnbëtar që ka këtë mendim ma sill mua këtu. Unë jam Presidenti i Republikës, nuk merrem me llafe dhe thashetheme, por për hir të transparencës m’i sill këtu. Ndërkombëtarët e Ramës me këto punë do merren, unë punoj me letra jam serioz”.
Meta u tregua dhe më konkret në akuza, kur përmendi dy organizmat ndërkombëtarëtë reformës,në deklaratën: “Kush merrte kurajo për të bojkotuar presidentin e Republikës në vendin ku punon? Euralius dhe Opdat punojnë me urdhrat e Edi Ramës”.
Ai dha gjithashtu të kuptuar se vërtet nuk e ka pritur ambasadoren Yuri Kim në Presidencë, duke zgjedhur t’i nxjerrë këshilltarët, ndërkohë që arriti kulmin me deklarimin se Rama është agjent serb në SHBA,
“Rama përfaqësues i lobit serb në SHBA. E them me bindje do e provojë koha. Lobi serb dhe ai pro rus në Uashington i intereson përplasja civile dhe destabilizimi në Shqipëri. Kam shumë prova dhe dokumente që do i bëj publike në kohën e duhur. SMS që u bë publike sot do duket pa vlerë në raport me to. Do flas në të ardhmen dhe në kohën e duhur”, tha kreu i shtetit.
Pra, gjykuar nga fjalët e tij, ai po lë me vetëdije që Shqipëria të qeveriset nga një agjent serb, së paku duke mos e provuar publikisht me fakte se Rama është i tillë.
Për më tepër, rikthimin e tij në pozitën para pandemisë, edhe pse kjo e fundit ende është aktive, e përligji me pretendimin se serbët po synojnë destabilitetin e Shqipërisë.
“Nuk kishte kohë për të pritur të dilnim nga pandemia sepse kemi të bëjmë me një skenar për trazira dhe përplasje në Shqipëri dhe kjo ka në sfond edhe zhvillimet rajonale. Për arsye të brendshme që të provokojë opozitën, të ikë nga çështja e Kodit, të harrojë 15 kushtet e BE-së. Ka marrë një porosit të destabilizojë, të nxehë situatën në Shqipëri. Lobit shumë të fuqizuar pro serb në Uashington siç i interesonte edhe vjet përplasja për zgjedhjet lokale.
Edhe vjet aty ishte qëllimi, të ketë përplasje dhe gjakderdhje dhe opozita e Lulit dhe Monës të shpallej organizatë terroriste. Kam shume prova dhe dokumenta qe do i bej publike ne kohen e duhur. Mund të ketë ndonjë zhvillim interesant në Kosovë në periudhën në vijim”, deklaroi njeriu në krye të shtetit shqiptar. /tesheshi.com/
