Ilir Meta i ka kërkuar sërish Edi Ramës largimin e Ministrit të Brendshëm, Saimir Tahiri.
Një përplasje e fortë mësohet se është zhvilluar ditën e djeshme gjatë takimit në vilën e Mehmet Shehut, ku asnjëri nuk është tërhequr në fund.
Rasti i operacionit ndaj Klement Balilit duket se ka qenë vetëm një nga shkaqet e kësaj përplasjeje që ka krijuar një ngërç të fortë mes kreut të Kuvendit dhe ministrit të Brendshëm.
Por siç mësohet, ajo që ka acaruar më shumë Metën ka qenë kërkesa e më pas vendimi i Saimir Tahirit për të ngritur në Tiranë qendrën e Departamentit Amerikan Kundër Narkotikëve, të famshmen DEA.
Shumë shpejt pritet që një ekip i zgjeruar i agjencisë prestigjoze të vendoset në Tiranë me pajisjet e saj të avancuara, të cilat janë edhe një nga faktorët kryesorë të suksesit në kapjen e baronëve të drogës.
DEA ka ngritur në Ballkan dy qendra të fuqishme të saj për të investiguar trafikun e drogës: një në Greqi ku është instaluar prej 12 vjetësh, dhe një në Bullgari ku ndodhet prej 5 vjetësh. Greqia dhe Bullgaria janë dy vende të rëndësishme të tranzitit të narkotikëve dhe ndodhen në udhëkryqe strategjike.
Në qendrën e DEA-s që pritet të instalohet në Tiranë mësohet se do të vijë një bërthamë prej 20 ekspertësh për kanabisin dhe heroinën. Ekspertët antinarkotik do të vijnë nga qendra Marakeshit, Athinës dhe Sofjes.
Të trija këto qendra kanë aritur të gjurmojnë lidhje të fuqishme të trafikantëve shqiptare me këto udhëkryqe ballkanike.
Një pjesë e politikës shqiptare është e shqetësuara në masë të madhe, pikërisht nga gjurmimi i agjencive të rëndësishme perëndimore të eksponentëve të lidhur me drogën.
Zhurma e fundit për “përgjimet” e aluduara që ka trazuar deri dhe Presidentin, kreun e SHISH, por edhe Prokurorinë kundër Saimir Tahirit, pa llogaritur skalionet e politikës së ditës, është dëshmi e fortë e kësaj lëvizjeje politike.
Dhe në këtë pikë, konflikti me Saimir Tahirin ka mbërritur në kuota aq të larta antagonizmi, sa që dhe Meta i ka kërkuar Ramës largimin e tij, duke e justifikuar me atë që e ka quajtur “ulje të imazhit publik”.
Por Ministri i Brendshëm ka mbështetje shumë të fuqishme nga amerikanët dhe e gjithë zhurma ka nisur para ardhjes së FBI-së dhe DEA-s në Shqipëri, ku duket se vështitë të ketë kthim pas.
Nga kjo pjesë e politikës po mbështeten qarqe të gjera mediatike kundër Tahirit.
Pikërisht, për të matur “temperaturën” e qëndrimit të Ilir Metës, mjafton të analizosh një shkrim të Artur Zhejit, i njohur si krahu mediatik i kryetarit të LSI-së.
Ja ç’shkruan Zheji:
Saimir Tahiri, Ministri ynë i Brendshëm, ndaj të cilit fillimisht nuk kanë munguar simpatitë, ka më shumë se një vit, që po gjindet në vështirësi politike të parrëfyeshme…
Pra Rama, te miku i vet, Sajmja, ish presidenti i Fondacionit “Qemal Stafa”, gjithësesi një politikan simpatik dhe mbështetës pa ekuivok dhe pa hezitim dhe besnik i kryeministrit, ka ngarkuar ca mbipesha gjithnjë më të rënda, gjithnjë e më të papërballueshme dhe tejet konsumuese.
Dukshëm tanimë, ministri Tahiri, po jep shenja të lexueshme rraskapitjeje dhe të një mosartikulimi mediatik bindës”.
Këto kanë qenë në fakt edhe argumentet që janë shtruar e në takimin e krerëve të koalicionit, por Rama mësohet se i ka kërkuar Ilir Metës që të mos bëjë lojra me institucione të larta shtetërore duke aluduar për Prokurorinë, ndërkohë që ka bërë të ditur se nuk e ka problem sulmin mediatik nga qarqe tashmë të zbuluara qartë se nga i marrin financimet.
Qëllimi i Metës dhe i përkrahësve të tij në luftën kundër Tahirit, është që ta kryejnë shkarkimin e tij para vizitës në Tiranë të zv.presidentit të SHBA-së, Joe Biden dhe Sekretarit të Shtetit, James Kerry, i cili do të vijë sërish në Tiranë.
Pas kësaj gjërat do të jenë shumë të vështira, pasi Uashingtoni duket se i ka marrë frenat në dorë; këtu dhe Saimir Tahiri është një nga partnerët kryesorë. Ardhja e FBI-së pas dy javësh është treguesi kryesor për këtë. /tesheshi.com/
