Ambasadorja e re amerikane në Shqipëri, Yuri Kim, nisi këtë të hënë aktivitetin e saj diplomatik, duke u takuar në fillim me Presidentin Meta, te i cili kreu ritin protokollar të paraqitjes së letrave kredenciale.
Ky i fundit shfrytëzoi rastin për të deklaruar besnikëri politike ndaj Uashingtonit, e kjo në një kohë kur është përplasur fort me ndërkombëtarët, përfshirë dhe Ambasadën Amerikane, lidhur me atë që e konsideron si rol negativ të tyre në zhvillime që kanë të bëjë me Reformën në Drejtësi. Kujtojmë se paraardhësi i znj.Kim, ish-ambasadori Lu, ishte ndër ata me të cilin Meta pati edhe fërkime të natyrës publike.
Nisja e aktivitetit diplomatik të ambasadores së re amerikane, pritet me interes për vetë rolin që do luajë ajo në zgjidhjen e krizës së rëndë në politikën shqiptare, gjë të cilën ajo e ka paralajmëruar kohë më parë. Në këtë prizëm, ajo shihet si “shpresa e fundit” e ardhur nga përtej Atlantikut, për të shuar një rebelim të natyres opozitare shfaqur sidomos në Presidencë.
Ndërkohë, nga njeriu që është në këtë të fundit, e që mazhoranca kërkon ta nxjerrë që aty me shkarkim nën akuzën e shkeljes së Kushtetutës duke anulluar njëanshmërisht 30 Qershorin, shkroi miklueshëm: “I kënaqur të prisja dhe të pranoja Letrat Kredenciale të Ambasadores së re të SHBA, znj.Yuri Kim. SHBA një partner strategjik, i pazëvendësueshëm për Shqipërinë. Së bashku të përballojmë me sukses sfidat që ka vendi. Zoti e bekoftë miqësinë shqiptaro-amerikane! /tesheshi.com/
