Kryeari i AAK-së, Ramush Haradinaj është politikani i parë nga Kosova që ka uruar Ilir Metën, pas zgjedhjes si president i ri i Shqipërisë.
“Urimet më të mira për zgjedhjen tuaj President i Republikës së Shqipërisë! Jam i bindur se Ju do të punoni me përkushtim në zhvillimin dhe avansimin e Shqipërisë si dhe në mbrojtjen e interesave shtetërore, por edhe kombëtare të shqiptarëve kudo që janë. Mbetem me shpresë poashtu se zgjedhja e Juaj, do të kontribuojë edhe në forcimin e marrëdhënieve ndërmjet Kosovës dhe Shqipërisë! Poashtu shpreh mirënjohjen time për punën e shkëlqyer të Presidentit Nishani!”, thuhet në urimin e Haradinajt.
Pas tij, Metën e kanë uruar edhe presidenti Thaçi dhe kreu i NISMA-s Fatmir Limaj.
Thaçi përmes një postimi në llogarinë e tij në Facebook ka treguar se Meta ka qenë mbështetës i madh i Kosovës në të gjitha funksionet e tij politike.
“Bashkëpunimi ndërmjet Kosovës dhe Shqipërisë ka qenë gjithmonë vëllazëror dhe institucional, përtej çdo interesi tjetër dhe i tillë do të jetë edhe në të ardhmen”, ka thënë Thaçi.
Kurse, Limaj shpreh bindjen e plotë se me eksperiencën e gjerë që gëzon Meta, do të kontribuon në forcimin e perspektivës evropiane të Shqipërisë dhe tërë rajonit. /tesheshi.com/
