Ilir Meta ia ka atribuuar partisë së tij realizimin e reformave, por pa specifikuar ndonjërën prej tyre. Nga Berati ku ishte për vizitë, pak orë para se në LSI të hapet gara për kryetarin e ri, aleati qeveritar e ngriti “lart e më lart” vlerën e LSI-së:
“Padyshim që roli i Lëvizjes Socialiste për Integrim ka qenë kyç për realizimin e shumë reforma në vend dhe në mënyrë të veçantë për arritjen e konsensusit për reformën kryesore, atë të drejtësisë. Sepse vetëm përmes bashkëpunimit për çështjet më të mëdha që i interesojnë të ardhmes afatgjatë të vendit dhe qytetarëve tanë, ne do të arrijmë të plotësojmë të gjitha ato standarde që kërkon anëtarësimi në Bashkimin Europian, por që kërkon edhe përmirësimi i vazhdueshëm i standardeve të jetesës së qytetarëve tanë”.
Por prej muajsh, PS dhe LSI nuk janë në një klimë të mirë raportesh. Siç është shfaqur dhe në horizont, vendin e saj në qeverisje si aleat kyç mund të zërë PDIU-ja e Shpëtim Idrizit, eksperimentuar me sukses në zgjedhjet e pjesshme të Dibrës. /tesheshi.com/
