Ashtu siç pritej, presidenti Meta u rreshtua krah gazetarëve përballë ligjit “anti-shpifje” të qeverisë, jo me mosfirmosje dekreti por me qëndrim politik.
“Liria e medias në vendin tonë është përkeqësuar. Kushtet e punës gjithashtu. Shqetësimet e gazetarëve të terrenit nuk dëgjohen. Pronarë e drejtues mediash e kanë asgjësuar postin e kryeredaktorit të lajmeve se e bëjnë vetë.
Kufizimet ndaj gjuhës së urrejtjes nuk duhet kurrsesi të keqpërdoren me qëllim mbytjen e kritikës ndaj qeverisjes dhe të zgjedhurve, të bindjeve të ndryshme politike, apo të kërkesës për llogaridhënie”, u shpreh kreu i shtetitnë Konferencën vjetore të Avokatit të Popullit me temë “Liria pa urrejtje, liria e shprehjes përballë të drejtave të tjera të njeriut”.
Meta revokoi dhe kohën e komunizmit, në mesazhin e nënkuptuar se “anti-shpifja” e Ramës po sjell pikërisht atë kohë.
“Nuk harrojnë dot dramën që shkaktoi mohimi i kësaj lirie në 50 vite të diktaturës, kalvari i vrasjeve, dënimit dhe cenimit të dinjitetit njerëzor.
Të gjithë jemi të vetëdijshëm se ka korrelacion mes lirive civile dhe demokracisë, sa më e konsoliduar demokracia aq më të mbrojtura janë liritë e individit”, tha Meta, i cili ka marrë lutjen e një grupi gazetarësh kundërshtarë të Ramës, për të mos e dekretuar ligjin. /tesheshi.com/
