Presidenti Meta e ka nisur ditën ashpërsisht, nën pretendimin se mazhoranca i ka rrëmbyer kompetencat kushtetuese, në një përpjekje për të marrë kontrollin e Gjykatës Kushtetuese.
Ai madje, në një status të gjatë ku thotë se po ofron fakte, por që më shumë ka komente, në këto të fundit nis e ironizon figura politike nga mazhoranca, përfshirë dhe kreun e KED-it, Adrian Dvorani.
“Lind pyetja e pafajshme e çdo fëmije: Përse xhaxhi Dvorani nuk ia nisi në fillim dy vakancat Kuvendit e pas 6 ditësh t’ia çonte Presidentit? Se ke degjuar ti xhaxhi Dvorani, xhaxhi Gramozin dhe xhaxhi Ulsiun që thonë çdo ditë që Parlamenti është i pari se jemi Republikë Parlamentare, e jo Presidenciale?
Mos kini asnjë dyshim se Etilda do mbajë një fjalim plot ‘Etikë’ e madje do i dalin dhe lot gëzimi nga kontributi i saj për realizimin e kryeperlës së Ramaformës”, janë këto disa nga frazat e mesazhit të Metës, gjithnjë në funksion të nxitjes së njerëzve që t’i bashkangjiten më 2 mars, kur ai të zbresë në bulevard për t’ju kundërvënë mazhorancës, që për paradoks e ka zgjedhur si president më shumë se dy vite më parë.
“Ndaj të dashur qytetarë, zgjohuni dhe ngrihuni se këtu institucionet kanë rënë përtokë. Ngrihuni për të rivendosur sovranitetin tuaj të nëpërkëmbur përmes rivendosjes së rendit kushtetues, demokratik dhe llogaridhënës”, shkruan Meta.
Nga ana tjetër, thënia e urtë që Rama ka zgjedhur këtë mëngjes, duket se i dedikohet pikërisht Metës. Rama ka zgjedhur thënien e një imami.
“Cilido që vepron brutalisht vështirëson qëllimin e tij”- është ajo me të cilën Rama nis ditën. /tesheshi.com/
