Zakonisht, procesi i dhënies së lejeve të legalizimeve ka qenë ndër spektaklet politike më të prefeuara të kryeministrit Rama. Por kësaj here në vend të tij është shfaqur Meta, duke qenë pra kreu i LSI-së në krah të Artan Lames, dhe duke përfituar njëherësh bonuset politike nga ky proces që përkthehet si votë e sigurt të dëshpëruarish nga moslegalizimet. Kjo ndodhi paraditën e kësaj të henë në Ishëm të Durrësit, aty ku u dorëzuan dhe 700 leje. Dhe Meta ia ka shpërblyer aleatit të tij këtë nder, duke vlerësuar Lame si kokë e ALUIZN-it dhe drejtorin lokal të kësaj instance, Flamur Gjuzi:
“Dua të përshëndes zotin Lame dhe zotin Gjuzi për punën e madhe që është bërë, sepse vërtet në pak kohë është bërë ajo që nuk është bërë në 8 vite. Aq më tepër që kemi të bëjmë me legalizimin e pronave tuaja në një vend që ka shumë vlerë dhe që do të ketë akoma më shumë pas një procesi të suksesshëm të urbanizmin, për të cilin edhe vetë komuniteti duhet të ndërgjegjësohet edhe më shumë”, tha Meta.
Ndërsa Lame nga ana e tij, vlerësoi mbajtjen e fjalës nga ana e qeverisë, sa u takon legalizimeve:
“Askush nuk mund të konkurrojë atë që u bë gjatë 3 viteve të kësaj qeverie me sa janë bërë më përpara. Tani të gjithë shqiptarët e dinë që legalizimet do bëhen dhe se kjo qeveri e mbajti fjalën”, tha Lame. /tesheshi.com/
